Nəsimi RİH başçısı yanında Şuranın iclasında 2019-cu ilə yekun vuruldu - FOTO
Nəsimi Rayon İcra Hakimiyyətinin başçısı yanında Şuranın iclası keçirilib.
Nəsimi RİH-dən "Bakı Xəbər"ə bildirildiyinə görə, toplantıda Prezident yanında 2019-cu ilin yekunlarına həsr olunmuş müşavirədə qarşıya qoyulmuş vəzifələr müzakirə olunub, yeni ilin başlıca hədəflərini əhatə edən qərarlar qəbul edilib.
Toplantını giriş sözü ilə açan Nəsimi Rayon İcra Hakimiyyətinin başçısı Asif Əsğərov bildirib ki, keçən il Bakının Nəsimi rayonunda da davamlı sosial-iqtisadi inkişaf təmin edilib, bir sıra layihələr uğurla həyata keçirilib.
Yığıncaq iştirakçılarına rayonda son bir ildə baş verən yenilikləri və ümumi irəliləyişi əks etdirən slayd təqdim olunandan sonra Asif Əsgərov 2019-cu ildə sosial-iqtisadi inkişafın əsas göstəricilərini şərh edib, ölkə başçısının paytaxtın və onun rayonlarının hərtərəfli inkişafı ilə bağlı həyata keçirdiyi siyasətin növbəti hədəfləri barədə məlumat verib. Qeyd edib ki, Prezident İlham Əliyevin ötən ilin əvvəlində yerli icra strukturlarına verdiyi tapşırıqların Nəsimi rayonunda bütünlüklə və ardıcıl icrası ilin uğurla başa çatdırılmasını təmin edib. Dövlət başçısı paytaxtın mərkəzi rayonunun problemlərinin həllini daim nəzarətdə saxlayır, gerçəkləşdirilən layihələri ardıcıl himayə edir. Prezident İlham Əliyevin və Birinci vitse-prezident Mehriban Əliyevanın rayona hər gəlişi nəsimililərin həyatında əlamətdar hadisəyə çevrilir.
A.Əsgərovun sözlərinə görə, hesabat ilində Bakı şəhərinin Nəsimi rayonunun sosial-iqtisadi inkişafında, müəssisə və təşkilatların fəaliyyətində nəzərəçarpacaq müsbət irəliləyişlər olub. Rayon üzrə iqtisadiyyatın bütün sahələrində mövcud olan artım dinamikası saxlanıb, 9000 yeni daimi iş yeri açılıb, orta aylıq əmək haqqı əvvəlki illə müqayisədə 16,9% artaraq, 762.6 manat təşkil edib.
Prezident cənab İlham Əliyevin və Birinci vitse-prezident Mehriban Əliyevanın ötən il 28 May, Dilarə Əliyeva və Fikrət Əmirov küçələrinin kəsişməsində yerləşən yeni parkda yaradılan şəraitlə tanış olmağı, metronun 28 May stansiyasının qarşısında vətəndaşlarla görüşü və Dəmir Yolu Muzeyi ilə tanış olmağı, Mehriban Əliyevanın Nəsimi rayonundakı 268 nömrəli xüsusi məktəbdə uşaqlarla görüşü, 1 nömrəli körpələr evini növbəti dəfə ziyarət etməsi 2019-cu ildə Nəsimi rayonunun ictimai-siyasi həyatında əlamətdar hadisələr olub.
Aprelin 26-da Birinci vitse-prezidentin Nəsimi rayonunda yerləşən Tibb Universitetinin 4 saylı yataqxanasında məskunlaşan məcburi köçkünlərin yaşayış şəraiti və problemləri ilə tanış olarkən köçkün ailələrinin Qobuda yerləşən yeni yaşayış massivinə köçürülmələri barədə göstərişindən sonra qısa müddətdə 478 nəfərdən ibarət 131 məcburi köçkün ailəsinin Qaradağ rayonu “Qobu Park” yaşayış kompleksinə köçürülməsi Prezident İlham Əliyevin rəhbərliyi ilə həyata keçirilən çoxsaylı layihələrin ölkədə aparılan siyasətin mərkəzində Azərbaycan vətəndaşının dayanması amilinin ötən ildə də reallaşdırıldığına bariz nümunədir.
Ölkəmizdə təhsil və gənclərin inkişafı, əhalinin sağlamlığının qorunması istiqamətində həyata keçirilən proqramlarla yanaşı, Heydər Əliyev Fondunun reallaşdırdığı layihələr Nəsimi rayonunda da mühüm nailiyyətlərin qazanılmasına şərait yaradıb. Heydər Əliyev Fondunun vitse-prezidenti Leyla Əliyevanın təşəbbüsü və dəstəyi ilə 2019-cu il ərzində Nəsimi rayonu Rəşid Məmmədov küçəsi 23, 25, 27, Hüseyn Seyidzadə küçəsi 20, 22 24, 26, 28, Moskva pr. 46, 48, Cavadxan küçəsi 1, Cavadxan küçəsi 3, 5, 7, Asif Məhərrəmov küçəsi 34, 38, 42, 46, Rəşid Məmmədov küçəsi 9, 9 ünvanlarında “Bizim həyət” və “Abad həyət” layihələri həyata keçirilmişdir.
Hər il həyata keçirilən əhalinin tibbi müayinəsi və yeniyetmələrin “Ölkəmizi tanıyaq” devizi altında respublikamızın ayrı-ayrı bölgələri ilə tanışlığı üçün tur-aksiyaların, həmçinin Qusar rayonunda məktəblilərin yay istirahət düşərgələrinin təşkili tədbirləri Nəsimi rayon sakinləri tərəfindən dərin minnətdarlıq hissləri ilə qarşılanıb.
Ötən tədris ilində rayonun orta məktəblərini 1574 nəfər bitirib, onlardan 1233 nəfəri tələbə adını qazanıb. Məzunlardan 327 nəfəri xarici ölkələrin ali məktəblərinə, 57 nəfəri 600-dən çox, 8 nəfəri 650-dən çox bal toplayaraq ali məktəblərə qəbul olunub.
Azərbaycan Prezidentinin Sərəncamı ilə 2019-cu ilin “Nəsimi ili” elan edilməsi rayon üçün tarixi və əlamətdar hadisə olub, Böyük Azərbaycan şairi İmadəddin Nəsiminin 650 illik yubileyi Nəsimi rayonunda da böyük fərəh və ruh yüksəkliyi ilə qeyd olunub.
Ötən il abadlıq və quruculuq sahəsində də tədbirlər davam etdirilib. Qaz, elektrik enerjisi, istilik, su təchizatı və kanalizasiya sistemlərinin yaxşılaşdırılması, rayonun küçələrinin və məhəllədaxili yolların əsaslı təmiri, yenidənqurulması və işıqlandırılması işləri uğurla həyata keçirilib.
Vətəndaşların rifahının daha da artırılması, onların asudə vaxtlarının səmərəli təşkilinin təmin edilməsi, sosial infrastrukturların yaradılması ilə bağlı tədbirlərin görülməsi barədə tapşırıqların icrası istiqamətində 2019-cu ildə geniş abadlıq-quruculuq işləri aparılaraq Asif Məhərrəmov küçəsi başdan-başa yenidən qurulub, binaların fasadları, liftlər, dam örtükləri təmir edilib, həyətlərdə abadlıq işləri aparılıb, yeni yaşıllıq zolaqları salınıb.
Əhalinin məşğulluq səviyyəsinin artırılması, yeni iş yerlərinin açılması, sahibkarlığın inkişaf etdirilməsi, sərmayələrin cəlb edilməsi, sakinlərin mənzil-məişət şəraitinin yaxşılaşdırılması, mövcud şəhərsalma normalarına cavab verməyən, şəhərin ümumi görünüşünə xələl gətirən yaşayış binalarının, sosial və digər qeyri-yaşayış obyektlərinin sökülərək yenidən qurulması, yeni yaşayış binalarının inşa edilməsi üzrə 25 layihənin icrası ötən il davam etdirilib, layihələrin bir neçəsində tamamlanma işləri aparılaraq sakinlərə yeni mənzillərin təqdim olunmasına başlanıb.
Rayon İcra Hakimiyyətinin təşkilatçılığı ilə tarixi günlər və yubileylərlə bağlı kütləvi tədbirlər keçirilib, ümumxalq bayramları, ayrı-ayrı peşə günləri təntənə ilə qeyd olunub, müxtəlif sahələrdə fərqlənənlər mükafatlandırılıb.
Vətəndaşların müəyyən edilmiş vaxtlarda qəbulu, onların müraciətlərinə əsaslandırılmış yazılı cavabların verilməsi, şəffaflığın artırılması, mövcud nöqsanların aradan qaldırılması məsələləri daim diqqət mərkəzində saxlanıb.
Hesabat göstəricilərinə yekun vuran Nəsimi rayon İcra Hakimiyyətinin başçısi qeyd edib ki, əldə olunmuş uğurlar yeni nailiyyətlər üçün möhkəm zəmin yaradıb.
Hesabat yığıncaqda çıxış edənlər rayonda görülmüş işləri yüksək qiymətləndirib, qarşıda duran vəzifələrdən, həlli vacib məsələlərdən söhbət açıblar.
Azərbaycan Prezidenti Administrasiyasının sektor müdiri Tağı Tağıyev yığıncaqda çıxış edərək, 2020-ci ildə rayon sakinlərinə daha böyük uğurlar arzulayıb.
Müzakirələrdən sonra cari ilin konkret hədəflərini əks etdirən qərar qəbul olunub. Toplantı iştirakçıları adından Prezident İlham Əliyevə ünvanlanan müraciətdə rayonun sürətli inkişafına göstərdiyi diqqət və qayğıya görə ölkə rəhbərinə minnətdarlıq, Nəsimililərin quruculuq əzmi ifadə olunub.
Yekun hesabatda rayonun ictimai-siyasi həyatında fəal iştirak edən yubilyarlara Nəsimi rayon İcra Hakimiyyətinin xatirə hədiyyələri təqdim olunub.
