02/04/2020 16:41
728 x 90

Prezident parkovka məsələsində əhalinin xeyrinə alternativlər yaratmaq zərurətindən danışdı, Vüsal Kərimli Bakıda fərqli tariflər üzrə zonalardan...

Azər Allahverənov: “Avtomobili saxlamaq üçün yer varsa, bu o demək deyil ki, parkovka mütləq ödənişli olmalıdır”

img

“Biz burada da hər şeyə ədalətli yanaşmalıyıq. Parkinq imkanları olmalıdır ki, sonra biz vətəndaşlardan bu qaydalara riayət etmələrini tələb edək”. Bunu Prezident İlham Əliyev Bakı Nəqliyyat Agentliyinin İdarə Heyətinin sədri Vüsal Kərimlini qəbul edərkən deyib.

Prezident bildirib ki, bəzi hallarda sürücülər parkinq qaydalarını kobudcasına pozurlar: “Parkinq olan yerdə maşınları münasib olmayan yerlərdə saxlayıb, həm piyadalara maneə törədirlər, həm də nəqliyyata problem yaradırlar. Ancaq kifayət qədər böyük imkanlar, yəni parkinq yerləri olmalıdır ki, biz sürücülərə bu tələbləri irəli sürək. Burada da heç bir qanun pozuntusu olmamalıdır. Qanun qarşısında hamı bərabərdir. Hamı bilməlidir ki, şəhər nəqliyyatı həm insanların rahatlığıdır, həm bizim sağlamlığımızdır, həm də havanın təmiz olmasıdır. Yenə də deyirəm, havanı ən çox çirkləndirən nəqliyyat vasitələridir, xüsusilə tıxac olan yerdə. Tıxacın olmaması isə sizin əsas vəzifənizdir. Siz bundan sonra da aidiyyəti dövlət qurumları ilə bu istiqamətdə fəal olmalısınız. Ona görə parkinqlə bağlı soruşmaq istəyirəm. Vəziyyət necədir və bu il hansı addımlar gözlənir?”.

Vüsal Kərimli isə parkinq məsələsində fərqli tariflərin tətbiq olunmasını məqsədəuyğun hesab etdi: “Bu il biz parkinqlə əlaqədar bu istiqamətdə fəaliyyət göstərən beynəlxalq məsləhət xidmətlərini cəlb etmişik ki, Bakı şəhərində parkinq məsələsi nəinki infrastruktur cəhətdən, eyni zamanda, iqtisadi baxımdan analiz olunsun. Çünki şəhər zonalara bölünməlidir. Bunun gecə vaxtları var. Şəhərdə tıxac olan vaxtlarda açıq yolları analiz edib harada neçə yeraltı parkinqmi, küçə parkinqimi, yoxsa, xüsusilə molların və insanların yaşadığı əsas yerlərdə modul parkinqlər tikilməlidir və onların tarifləri olmalıdır. Şəhər mərkəzinin tarifi fərqli qiymətdə olmalıdır. “B” zonası fərqli qiymətdə olmalıdır”.

Maraqlıdır, bəs ekspertlər bütün bunları necə dəyərləndirir və optimal həll yolunu nədə görürlər?

  • “Bu məsələ ilə bağlı araşdırma apardıqda, təkliflər irəli sürüldükdə müvafiq qurumların, vətəndaşların...”

Məsələyə münasibət bildirən nəqliyyat sahəsi üzrə ekspert Azər Allahverənovun fikrincə, avtomobillərin parklanması zamanı fərqli tariflər tətbiq edilərkən bütün tərəflərin maraqları nəzərə alınmalıdır: “Əvvəla Prezident İlham Əliyev bununla bağlı çox vacib məqamlara toxundu. Ərazidə avtomobilin park edilməsi üçün yer yoxdursa, o zaman sürücü məcbur olur qanunsuz olaraq haradasa maşını saxlayır. Parkovka yeri olmadığından, insanlar inzibati xətaya yol verirlər. Bu da nəticə etibarilə sonradan onlara problem yaradır. Yəni avtomobil sahibləri cərimələnir və bu, narazılıqlara yol açır. Ona görə də avtomobillərin park edilməsi üçün xüsusi yerlər olmalıdır. Burada söhbət təkcə ödənişli parklardan getmir. Söhbət həm də ödənişsiz parkovka yerlərinin yaradılmasından kedir. Avtomobili saxlamaq üçün yer varsa, bu o demək deyil ki, parkovka mütləq ödənişli olmalıdır. Ona görə də bütün bu məsələlərə diqqət edilməlidir. Avtomobillərin park edilməsi üçün pulsuz yerlər də olmalıdır. Avtomobil sahiblərinin bununla bağlı alternativləri olmalıdır. Problemin həllinə kompleks yanaşma ortaya qoyulmalıdır. Beynəlxalq təcrübədə avtomobillərin park edilməsi ilə bağlı fərqli tariflər var, amma bu o demək deyil ki, bunu olduğu kimi Bakıda da tətbiq etmək olar. Bu məsələ ilə bağlı araşdırma apardıqda, təkliflər irəli sürüldükdə müvafiq qurumların, vətəndaşların, ictimai təşkilatların rəyləri və maraqları nəzərə alınmalıdır. Ondan sonra tariflərin tətbiqi və icra mexanizmi barədə düşünmək olar”.

Vidadi ORDAHALLI

Son xəbərlər