Xərclərə qənaət etməyin ən yaxşı yolu gözlənilməyən əlavə risqlərdən sığortalamaqdır. Ziyandəymə risqinin daha çox olduğu avtomobil sığortası bu mənada birinci yerdə gəlir. Nəzərə alsaq ki, ölkəmizdə əhali arasında da bu sığorta növü daha çox tanınır, o zaman çoxlarını maraqlandırır ki, Azərbaycanda avtomobili sığortalamaq neçəyə başa gəlir?
Məlumata görə, avtomobilin istehsal tarixindən, bazar qiymətindən, azadolma məbləğindən, sürücülük təcrübəsindən və bir sıra digər amillərdən asılı olaraq, sığorta haqqı arta və ya azala bilir. Ona görə də bazar qiyməti 11 min manat olan avtomobil misalı üzərində qiymətlər müəyyən edilib.
Bu arada məlum olub ki, sığorta bazarında bir çox şirkət istehsal ili 2008-ci ildən aşağı olan avtomobilləri sığortalamır. Əksər şirkətlər istehsal tarixi 2008-ci ildən yuxarı olan avtomobilləri sığortalamağa razılıq verirlər. Ənənəvi olaraq könüllü sığorta müştərilərinin qıtlığından şikayətlənən sığorta şirkətlərinin özü bəzi müştərilərdən könüllü imtina edirlər.
O da məlum olub ki, sığortaçılar hətta ucuz avtomobilləri də sığortalamaq istəmirlər. Hər vasitə ilə bundan yayınırlar. Ölkədə elə avtomobillər var ki, istehsal tarixi 2008-ci ildən aşağı olsa da, texniki göstəriciləri üstün səviyyədədir. Belə olan halda, həmin avtomobillərin sığortalanmaması nə dərəcədə doğrudur? Ümumiyyətlə, sığorta şirkətlərinin istehsal tarixi 2008-ci ildən aşağı olan avtomobilləri sığortalamaması düzgündürmü?
“Fikirləşirlər ki, belə avtomobillərlə bağlı sığorta halı baş versə, xərcə çox düşəcəklər”
Məsələyə münasibət bildirən iqtisadçı-ekspert Fuad İbrahimovun sözlərinə görə, sığorta şirkətlərinin avtomobil sığortasına bu çür yanaşması düzgün deyil: “Sığorta qanunvericiliyində bununla bağlı hər hansı məhdudiyyət yoxdur. Ancaq nəzərə almaq lazımdır ki, icbari sığorta buraxılış ilindən asılı olmayaraq, bütün avtonəqliyyat vasitələrinə şamil olunur. Ancaq avtomobillərin kasko sığortasına münasibət fərqlidir. Sığorta şirkətləri özəl olduqları üçün, bu məsələdə fərqli yanaşma sərgiləyirlər. Çünki bu sığorta növü icbari xarakterli olmadığından, bütün avtomobillərə şamil etmək olmur. Əslində, ilindən asılı olmayaraq, bütün avtomobillər sığortalanmalıdır. Bu zaman sığortanın həcmi avtomobilin istehsal ilindən asılı olaraq dəyişə bilər. Yoxsa, ili 2008-dən aşağı olan bütün avtomobillərin sığortalanmaması doğru deyil. Hesab edirəm ki, bütün avtomobillər hər hansı bir miqdarda sığortalanmalıdır. Çünki ili köhnə olan avtomobillərin sığortalanmaması avtomobil sahiblərinin hüquqlarının pozulması deməkdir. Sığortaçılar bu yolla öz risqlərini azaltmaq istəyirlər. Fikirləşirlər ki, belə avtomobillərlə bağlı sığorta halı baş versə, xərcə çox düşəcəklər. Ona görə də bundan yayınırlar. Hesab edirəm ki, bu sahəyə müəyyən dövlət nəzarəti artırılmalıdır. Çünki sağlam cəmiyyətdə sığorta şirkətləri belə bir problem yaratmamalıdırlar. O üzdən, bu sahəyə müdaxilə olmalıdır”.
Vidadi ORDAHALLI
