Azər Allahverənov: “Sürücülərə qoyulan plan yüksək olduğuna görə onlar gərgin şəraitdə işləməli olurlar”
Bakıda avtobus sürücüləri ilə bağlı nə qədər sərt addımlar atılsa da, yenə də sürücülərin özbaşınalığına rast gəlmək mümkündür. Bu sahədə son illər bəzi problemlər öz həllini tapsa da, hələ də müəyyən çətinliklər qalmaqdadır.
Problem xüsusən Bakıətrafı kənd və qəsəbələrə işləyən avtobuslarla bağlıdır. Məsələ ondadır ki, sözügedən istiqamətlərdə fəaliyyət göstərən marşrut xətlərində işləyən sürücülər fasiləsiz olaraq çalışırlar. Səhər sübh tezdən, axşam saat 11-12-dək rol arxasında otururlar. Hansı ki, qaydalara görə, bir sürücü sutkanın ancaq 8 saatını avtobusun idarə edilməsinə sərf etməlidir. Ancaq bu, faktiki olaraq, gözlənilmir. Sürücü 15 saat sükan arxasında olur. Nəticədə sürücülər yorulur ki, bu da sərnişinlərin həyatını təhlükə altına salır. Hansı ki, Bakıətrafı kənd və qəsəbələrin sakinləri hər gün bu risqlər altında səhərlər işə, axşamlar evə gedirlər. Ancaq sözügedən problem həll edilmir ki, edilmir.
- “Çıxış yolu nağdsız ödəniş sisteminin bütün marşrut xətlərində tətbiq edilməsindən keçir”
Sözügedən məsələ ilə bağlı fikirlərini “Bakı-Xəbər”lə bölüşən nəqliyyat sahəsi üzrə ekspert Azər Allahverənovun sözlərinə görə, bir sıra marşrut xətlərində avtobus sürücülərinin iş qrafiki çox ağırdır: “Məsələnin xoşagəlməz tərəfi həm də onunla bağlıdır ki, bir sıra marşrut xətləri plan əsasında işləyir. Yəni həmin marşrut xətlərində nağd ödəniş sistemi tətbiq edilir. O üzdən, sürücü maraqlıdır ki, planı, necə olursa-olsun, yerinə yetirsin. Əks halda qazancından və gəlirindən olacaq. Sürücülərə qoyulan plan yüksək olduğuna görə onlar gərgin şəraitdə işləməli olurlar. Bu da, nəticə etibarilə, sürücünün normadan artıq sükan arxasında oturmasına gətirib çıxarır. Ona görə də çıxış yolu nağdsız ödəniş sisteminin bütün marşrut xətlərində tətbiq edilməsindən keçir. İndi bu istiqamətdə müəyyən işlər gedir. Təəssüflər olsun ki, bu proses bizdə bir qədər gecikib. Şəhərin mərkəzində işləyən marşrut xətləri nağdsız ödəniş sistemindən istifadə edir. Bir qayda olaraq, bütün avtobuslar kartla işləyir. Ona görə də Bakıətrafı kənd və qəsəbələrə işləyən avtobuslar kart sisteminə keçsə, bu problemlər aradan qaldırılacaq. Əslində, sürücünün iş saatı 6 saatdan artıq olmamalıdır. Çünki sürücü yorulur, onun reaksiyası zəifləyir. Bu da onun sürücülük qabiliyyətinə mənfi təsir göstərir. Ona görə də sürücünün normadan artıq avtobusu idarə etməsi yolverilməzdir. Hətta bir sıra inkişaf etmiş ölkələrdə sürücü marşrut xəttində 4 saatdan artıq işləmir. Yəni növbəlilik əsasında sürücülər işləyirlər. Hesab edirəm ki, gec-tez bizdə də bu sistem tətbiq ediləcək. Bizdə sürücülərin fasiləsiz işləməsi halları nəinki Bakıətrafı kənd və qəsəbələrdə, bölgələrdə də mövcuddur. Ona görə də bu istiqamətdə kompleks tədbirlərin görülməsinə ehtiyac var. Tələblərə cavab verməyən şirkətlər marşrut xəttindən uzaqlaşdırılmalıdırlar”.
Vidadi ORDAHALLI
