22/09/2020 21:18
728 x 90

Gürcüstan Təhsil Nazirliyi soydaşlarımızın dərslik məsələsini hələ həll edə bilmir - Azərbaycan Təhsil Nazirliyi yenidən fəaliyyətdə...

Məlahət Mürşüdlü: “Azərbaycan dövləti görür ki, Gürcüstan hökuməti addım atmaq istəmir, bu səbəbdən də...”

img

Gürcüstanda yaşayan soydaşlarımızın Azərbaycan dilində orta təhsil almasına Gürcüstan hökumətinin yaratdığı süni əngəllərin miqyası get-gedə genişlənir. Gürcüstanın elm və təhsil qanunvericiliyində, habelə digər qanunlarda bu ölkədə yaşayan azsaylı xalqların, halbuki, Azərbaycan türkləri azlıq təşkil etmir, öz ana dilində sərbəst təhsil almaq hüququ var.

Təəssüflər olsun ki, bu ölkənin vətəndaşı olan ermənilərə öz dillərində təhsil almaları üçün geniş şərait yaradılsa da, onlar hər cür dərs vəsaitləri ilə təmin olunsalar da, ermənidilli məktəblərin fəaliyyətinə heç bir əngəl törədilmsə də, azərbaycanlılara münasibət belə deyil. Hələ də Azərbaycandilli məktəblərin kadr potensialının artırılması, məktəblərin dərsliklərlə təmin olunması qayğısı ilə Azərbaycan dövləti məşğul olur. Halbuki, Gürcüstanın özündəki ali məktəblərdə Azərbaycan məktəbləri üçün müəllim kadrları hazırlamaq, nəşriyyatlarda dərsliklər çap etmək tam mümkündür. Amma Gürcüstan tərəfi bu istiqamətdə addım atmaq istəmir.

Yadınıza gəlirsə, 2019-2020-ci tədris ili yeni başlayarkən Gürcüstanın Elm və Təhsil Nazirliyi bəyan etmişdi ki, Gürcüstandakı Azərbaycandilli məktəblər üçün dərs vəsaitləri Gürcüstanın özü tərəfindən hazırlanacaq. Buna səbəb kimi Gürcüstanda orta təhsilin 12 illik olmasını göstərirdilər. Nazirlikdən bildirilirdi ki, Azərbaycan tərəfin Gürcüstandakı Azərbaycandilli məktəblərə göndərdiyi dərsliklər guya onların standartlarına uyğun gəlmir. Azərbaycanın soydaşlarımızın oxuduğu anadilli məktəblərə göndərdiyi dərsliklər Gürcüstanın təhsil standartlarına, ölçülərinə uyğun gəlmirsə, onda Gürcüstanın Elm və Təhsil Nazirliyi bu vəsaitləri özü hazırlasın. Elm və Təhsil Nazirliyi söz versə də, hələ də sözünü tutub Azərbaycandilli məktəblər üçün dərsliklər hazırlamağa tələsmir. Azərbaycandilli məktəblərin əlacı isə yenə də Azərbaycanın Təhsil Nazirliyinin göndərdiyi dərsliklərə qalır.  

Bildirək ki, bu günlərdə yenə də Azərbaycan Təhsil Nazirliyi Gürcüstanda azərbaycanlı şagirdlərin dərsliklərlə təmin olunmasını öz üzərinə götürdüyünü bəyan edib. Təhsil nazirinin müavini Məhəbbət Vəliyeva deyib ki, Gürcüstanda fəaliyyət göstərən Azərbaycan məktəbləri Təhsil Nazirliyinin diqqətindədir. “Eyni zamanda, həmin məktəblərdə kadr təyinatı məsələsi də Təhsil Nazirliyinin diqqətindədir” - deyə nazir müavini vurğulayıb. Azərbaycan dövləti, ümumiyyətlə, hələ Sovet dövründən Azərbaycan Respublikasından kənarda yaşayan soydaşlarımızın dərslik probleminin həll edilməsinə dayaq olub, o cümlədən də Gürcüstanda yaşayan soydaşlarımızın bu problemini diqqət mərkəzində saxlayıb. Keçən əsrin 90-cı illərindən sonra Gürcüstanda yaşayan soydaşlarımız burada bir sıra problemlərlə üzləşdilər, o cümlədən, Azərbaycandilli məktəblərin qapadılması ilə bağlı xoşagəlməz tendensiya ilə qarşılaşdılar. Amma Azərbaycan dövlətinin səyləri nəticəsində Gürcüstandakı Azərbaycan məktəblərinin hamısı olmasa da, xeyli hissəsi qapadılmaqdan, bağlanmaqdan xilas oldu.

  • “İllərdir Azərbaycan Təhsil Nazirliyi Gürcüstandakı Azərbaycandilli məktəblərdə təhsil alan  şagirdlərin dərslik probleminin həllini öz üzərinə götürüb”

Tanınmış təhsil eksperti Məlahət Mürşüdlü hesab edir ki, Gürcüstandakı Azərbaycandilli məktəblərin problemlərinin həllində Gürcüstan hökuməti də fəaliyyət göstərməlidir. Azərbaycan dövlətinin mütəmadi olaraq soydaşlarımızın təhsil aldıqları məktəblərə diqqət və qayğı göstərdiyini, onların dərsliklərlə təmin edildiyini deyən M.Mürşüdlü hesab edir ki, bu, soydaşlarımızın öz yurdlarına, el-obalarına daha sıx bağlanmasına səbəb olur. Bununla belə, M.Mürşüdlünün fikrincə, Gürcüstan hökuməti azərbaycanlılara qarşı ayrıseçkiliyə son qoymalıdır. “Biz uzun müddətdir Gürcüstandakı Azərbaycandilli məktəblərin problemləri haqda danışırıq, müəllim kadrları ilə bağlı yaranan çətinliklərin aradan qaldırılması yollarını müzakirə edirik. Artıq gələn ildən Azərbaycan ali məktəblərində Gürcüstandakı Azərbaycandilli məktəblər üçün müəllim kadrlarının yetişdirilməsi məqsədilə kvota ayrılacaq, soydaşlarımız pulsuz təhsil alacaqlar, hətta onlara təqaüdlər də veriləcək. Bu, Azərbaycan dövlətinin atdığı təqdirəlayiq addımdır. Dərsliklərə gəlincə, illərdir Azərbaycan Təhsil Nazirliyi Gürcüstandakı Azərbaycandilli məktəblərdə təhsil alan soydaşlarımızın, şagirdlərin dərslik probleminin həllini öz üzərinə götürüb və hər il Gürcüstana dərsliklər göndərir. Bu da çox müsbət addımdır. Amma Gürcüstan hökuməti də soydaşlarımızın təhsil aldıqları məktəblərin qayğısına qalmalı, onların dərslik təminatının həlli üçün addımlar atmalıdır. Azərbaycan dövləti görür ki, Gürcüstan hökuməti addım atmaq istəmir, bu səbəbdən bu işi öz öhdəsinə götürür” - deyə müsahibimiz bildirdi.

İradə SARIYEVA 

Son xəbərlər