Uzun illərdən bəri Azərbaycan Milli Elmlər Akademiyasında (AMEA) ciddi struktur islahatları aparılacağı gözlənilirdi. Günün çağırışlarına cavab verməyən bir sıra elmi-tədqiqat institutlarının, şöbə və qurumların bağlanacağı, yaxud birləşdiriləcəyi haqqında fikirlər bildirilirdi. Bir sıra ekspertlər hesab edirlər ki, AMEA-da genişmiqyaslı struktur islahatları aparılmasına ciddi ehtiyac var.
Akademik Ramiz Mehdiyev AMEA prezidenti seçildikdən sonra artıq gözlənilən islahatlara start verilməyə başlayıb. Qeyd edək ki, AMEA prezidenti, akademik Ramiz Mehdiyevin imzaladığı sərəncamla Rəyasət Heyəti aparatının Mətbuat və informasiya idarəsi ləğv olunub. Onun yerinə İctimaiyyətlə əlaqələr, mətbuat və informasiya şöbəsi yaradılıb. Eyni zamanda, Mətbuat və informasiya idarəsinin tabeliyində olan şöbələr də ləğv olunaraq onların yerinə sektor yaradılıb.
Məlumata görə, struktur islahatları bundan sonra da davam edəcək və AMEA-nın Rəyasət Heyətinin aparatının digər idarələri ləğv olunaraq şöbə, şöbələrin isə ləğv olunaraq sektor yaradılması gözlənir.
AMEA-da islahatlar daha hansı sahələri əhatə edəcək?
Azərbaycan Milli Elmlər Akademiyasının İctimaiyyətlə əlaqələr, mətbuat və informasiya şöbəsindən redaksiyamıza daxil olan məlumata görə, AMEA-da artıq qurumların ləğv olunması, bəzi müəssisələrdəki şişirdilmiş ştatların olması, ehtiyac duyulmayan mütəxəssislərin çoxluğu nəzərdən keçiriləcək. İctimaiyyətlə əlaqələr, mətbuat və informasiya şöbəsinin müdiri Ağahüseyn Şükürov bizimlə söhbətində bildirdi ki, AMEA prezidenti akademik Ramiz Mehdiyev bu qurumda aparılacaq islahatlarla bağlı öz fikir və mövqeyini Rəyasət Heyətinin yaxın günlərdə keçiriləcək iclasında açıqlayacaq.
“Mətbuat və informasiya idarəsinin İctimaiyyətlə əlaqələr, mətbuat və informasiya şöbəsinə çevrilməsi...”
İctimaiyyətlə əlaqələr, mətbuat və informasiya şöbəsindən redaksiyamıza Azərbaycan Milli Elmlər Akademiyasının vitse-prezidenti, akademik İsa Həbibbəylinin akademiyada aparılacaq islahatlar barədə fikirləri təqdim edilib. İ.Həbibbəyli bu istiqamətdə AMEA-nın rəsmi mövqeyini açıqlayıb. “AMEA-da aparılacaq köklü islahatlar barədə akademik Ramiz Mehdiyevin fikirləri var. Onun öz fikirlərini akademiyanın elmi ictimaiyyəti qarşısında açıqlayacağını gözləyirik. Akademik Ramiz Mehdiyev uzun illər daşıdığı yüksək vəzifədə olarkən də AMEA-nın fəaliyyətinə nəzarət edib. O, akademiyada gedən proseslərə dərindən bələddir. İndi də təyin olunduğu gündən akademiyadakı prosesləri araşdırır. Hesab edirəm ki, akademik Ramiz Mehdiyevin AMEA prezidenti təyin olunması Azərbaycan Prezidenti İlham Əliyevin qurumun mövqeyinin möhkəmlənməsi, onun daha da inkişaf etdirilərək yeni mərhələyə çatdırılması istiqamətində atdığı addım kimi mühüm əhəmiyyətə malikdir. Konkret olaraq, Mətbuat və informasiya idarəsinin İctimaiyyətlə əlaqələr, mətbuat və informasiya şöbəsinə çevrilməsi, şübhəsiz ki, akademiyada aparılacaq struktur islahatları və optimallaşdırma siyasəti ilə əlaqədardır” - deyə İ.Həbibbəyli qeyd edib.
İradə SARIYEVA
