Sağlamlıq həm də yediyimiz qidadan çox asılıdır. Son zamanlar tüğyan edən xəstəliklər yeyib- içdiyimizə diqqət yetirməyin vacib olduğunu göstərir. Ölkənin ticarət mərkəzlərində satılan ərzaqların çoxunun mənşəyi, tərkibi, istifadə müddəti haqda sənədləri yoxdur. Qidadan zəhərlənmə və xəstəliyə yoluxma halları artır. Kulinariyamızda əksər yeməyin hazırlanmasında yağın istifadəsi xüsusi yer tutur.
Qidalanma üzrə mütəxəssislərin fikrincə, hər bir insan gün ərzində ən azı 100 qram yağ qəbul etməlidir. Bu şərtlə ki, həmin yağ keyfiyyətli olsun. Standartlara görə, kərə yağı 3 dərəcədən aşağı temperaturda maksimum 1 ay saxlana bilər. Amma mağazalarda aylarla satışda olan açıq kərə yağları var. Qutu yağların üzərində isə bir neçə ay saxlanma müddəti göstərilir.
Azərbaycanda əhalinin kərə yağına olan illik tələbatı 33 min tondur. Bunun 21 min tonu ölkədə istehsal olunur, qalanı xaricdən gətirilir. Ölkəyə əsasən Rusiya, Ukrayna, Belarus, Almaniya, Avstraliya və Yeni Zellandiyadan yeyinti yağı idxal olunur.
Ekspertlər bildirirlər ki, satışda "kərə yağı" adı ilə təklif olunan məhsulların əksəriyyətinin, əslində, kərə yağı ilə heç bir əlaqəsi yoxdur.
Elə bu günlərdə “Araz” marketdən yağ alan müştəri gördüyü mənzərədən şoka düşüb. Belə ki, paytaxt sakini Xanım İsrafilova sosial şəbəkədə başına gələn hadisəni yazıb. O bildirir ki, Yeni Suraxanıdakı “Araz” marketdən kərə yağı adıyla aldığı yağı əridərkən dəhşətli mənzərə ilə rastlaşıb: “Ucuz olduğuna görə hamı kimi mən də bir qutu “555” yağı aldım. Saxlamaq üçün əridib bankaya yığmaq istəyirdim. Yağı qaynadanda isə dəhşətli mənzərəylə rastlaşdım, köpükləndi, sonra qaralmağa başladı… Normal yağ belə olmur. Sonra həmin yağın qalanını mağazaya qaytarıb pulumu geri aldım”.
Şikayətçi xanım qeyd edir ki, o, növbəti dəfə mağazaya gedərkən həmin məhsulun satışda olduğunu görüb: “Ən pisi odur ki, həmin yağa endirim edərək hamının diqqətini çəkirlər. İndi ən çox satılan yağ yəqin ki odur… Buna görə də aidiyyəti qurumları araşdırmağa dəvət edirəm. Mən yağı qaynatdığım qabları saxlamışam. Kim istəyir gəlib götürsün, araşdırsın. Təki belə halların qarşısı alınsın. İnsanlarımız mənşəyi bəlli olmayan qidalarla zəhərlənməsinlər”.
“Araz” supermarketlər şəbəkəsi - Billurə Əmirova: “555” Rusiya istehsalı olan spred yağıdır”
Məsələ ilə bağlı öncə “Araz” supermarketlər şəbəkəsi ilə əlaqə saxladıq. “Araz” supermarketlər şəbəkəsinin PR meneceri Billurə Əmirova açıqlamasında bildirdi ki, qeyd olunan yağ kərə yağı deyil: “555” Rusiya istehsalı olan spred yağıdır. Yəni bitki tərkibli yağdır. Kərə yağı deyil. Məhsulun qablaşdırılmasında da spred yağı olduğu qeyd olunub. Daha çox şirniyyatların hazırlanmasında istifadə olunur. Qeyd edim ki, “Araz” marketlərində satılan kərə yağlarının qiymətliklərində kərə sözü yazılır. “555” yağı kərə olmadığından, qiymətliyində spred sözü qeyd olunub. Onu da əlavə edim ki, məhsulun hər partiyasından nümunə götürülür, Qida Təhlükəsizliyi Agentliyinin müvafiq yoxlanışından sonra satışa buraxılır”.
Mansur Piriyev: “Müştərinin dedikləri təsdiqini tapsa, ciddi ölçü götürüləcək”
Azərbaycan Qida Təhlükəsizliyi Agentliyinin İctimaiyyətlə əlaqələr şöbəsinin rəhbəri Mansur Piriyev bildirdi ki, məsələ araşdırılacaq: “Müştərinin dedikləri təsdiqini tapsa, ciddi ölçü götürüləcək”
Günel CƏLİLOVA
