Cari ilin doqquz ayında Bakı şəhərində qeydə alınan yol-nəqliyyat hadisələrində təyin olunmayan yerlərdən keçən piyadaların avtomobillərlə vurulması ümumi hadisələrin 52 faizini təşkil edir.
Bəllidir ki, əvvəllər piyadaların günahı ucbatından baş verən yol-qəza hadisələrində onlar yalnız inzibati məsuliyyətə cəlb olunurdular. Ancaq indi vəziyyət əksinə olacaq.
Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədov media nümayəndələrinə açıqlamasında bildirib ki, “Yol hərəkəti haqqında” Qanunun 40-cı maddəsinin tələblərinə əsasən, piyadalar qaydanı pozursa, cərimə olunurlar: "Piyada keçidi olmayan yerdən yolu keçmək 20 manat, sürət həddi 80 km/saatdan artıq olan yerlərdən keçmək isə 40 manat cərimədir. Amma məqsəd heç də piyadaları cərimələmək deyil. Əsas hədəf insanların maarifləndirilməsi və təhlükəsizliyin təminidir".
Şöbə rəisi onu da əlavə edib ki, piyadavurma hadisələrini təhlil etdikdə aydın olur ki, əsasən piyada keçidlərin yaxınlığında bu cür hallar daha çoxdur: "Ən çox piyadavurmalar yeraltı və yerüstü keçidlər olan ərazilərdə qeydə alınır. Paytaxtın inzibati ərazisinə düşən şəhərkənarı yerlərdə işə işıqlandırma olmayan ərazilərdə bu cür hadisələr baş verir. Piyada vuran zaman sürücü də məsuliyyət daşıyır. Bir çox hallarda həbs olunur. Amma qeyd edim ki, piyadaların günahı ucbatından baş verən qəzalar daha çoxdur. Piyadalar da bilməlidirlər ki, qəza onların günahı ucbatından baş verirsə, hadisələrin ağırlıq dərəcəsindən asılı olaraq, piyadalar inzibati məsuliyyətə deyil, cinayət məsuliyyətinə cəlb olunacaqlar".
Piyadaların iştirakı ilə qeydə alınan yol-nəqliyyat hadisələrində sürücünün deyil, piyadanın cinayət məsuliyyətinə cəlb olunması ekspertlər tərəfindən müsbət qarşılanır.
“Piyadanın günahı üzündən ağır yol-qəza hadisəsi baş verirsə, onun inzibati məsuliyyətə deyil, cinayət məsuliyyətinə cəlb olunması…”
Nəqliyyat sahəsi üzrə mütəxəssis Ərşad Hüseynov bildirdi ki, Azərbaycan təcrübəsində nəqliyyat vasitəsinin piyadanı vurduğu halların 98 faizində sürücü günahkar hesab edilir, cəmi iki faiz hallarda isə piyada günahkar sayılır: “Amma dünyanın heç bir ölkəsində belə bir hal yoxdur. İnkişaf etmiş Avropa ölkələrində bu məsələyə yanaşma başqadır. Avropa ölkələrində yol-nəqliyyat hadisələrində 60 faiz sürücü günahkar olur, 40 faiz piyada. Yeni dəyişiklik həmin yanlış təcrübəni, ədalətdən kənar yanaşmanı aradan qaldırmağa bir mesajdır ki, hadisəyə düzgün qiymət verilsin, piyada yol hərəkəti qaydaları üzrə mövcud vəzifələri icra etməkdə məsuliyyət daşısın, piyadanın günahı üzündən başqaları məsuliyyət daşımasınlar. Bu müsbət haldır. Piyadanın günahı üzündən ağır yol-qəza hadisəsi baş verirsə, onun inzibati məsuliyyətə deyil, cinayət məsuliyyətinə cəlb olunması daha məqsədəuyğundur. Beləliklə, piyadalar yolu keçərkən daha məsuliyyətli olacaqlar”.
Günel CƏLİLOVA
