08/12/2019 06:15
728 x 90

Özəl məhkəmə ekspertizalarının yolu açıldı…

Sahib Məmmədov: “Özəl məhkəmə ekspertizasının yaradılmasına ehtiyac var”

img

Xəbər verildiyi kimi, Azərbaycanda özəl məhkəmə ekspertləri fəaliyyət göstərəcəklər. Bununla bağlı "Məhkəmə ekspertizası fəaliyyəti haqqında” Qanuna dəyişiklik təklif edilir.

Qeyd edək ki, təklifdə qanunun 11-ci maddəsi (Məhkəmə eksperti) yeni redaksiyada verilir: Özəl məhkəmə eksperti qismində fəaliyyət göstərmək istəyən şəxs özəl məhkəmə eksperti şəhadətnaməsini almaq üçün müvafiq dövlət rüsumunun ödənildiyini təsdiq edən sənədlə yanaşı, aşağıdakı tələblərdən birinə cavab verdiyini təsdiq edən sənədləri təqdim etməlidir: ekspert qismində fəaliyyət göstərmək istədiyi ixtisas üzrə ən azı 10 il işlədiyini; ekspert qismində fəaliyyət göstərmək istədiyi ixtisas üzrə fəlsəfə doktoru və ya elmi dərəcəsinin olduğunu; xüsusi biliklərə malik olduğunu təsdiq edən beynəlxalq səviyyədə tanınan sənədlərinin (diplom, sertifikat və sair) mövcudluğunu.

Müvafiq icra hakimiyyəti orqanı özəl məhkəmə eksperti qismində fəaliyyət göstərmək istəyən şəxslərlə müsahibə keçirməlidir.

Özəl məhkəmə ekspertlərinə şəhadətnamələr müvafiq icra hakimiyyəti orqanı tərəfindən verilir.

  • “…ayrıca qanunvericilik aktı qəbul olunmalıdır”

 Azərbaycanda özəl məhkəmə ekspertlərinin fəaliyyət göstərməsinin əhəmiyyəti haqqında danışan hüquq müdafiəçisi Sahib Məmmədov “Bakı-Xəbər”ə açıqlamasında qeyd etdi ki, alternativ və özəl məhkəmə ekspertizası bu ilin aprel ayında Prezident İlham Əliyevin imzaladığı “Məhkəmə-hüquq islahatlarının əsas istiqamətlərinin sahibkarlarla ictimai müzakirəsi” Fərmanında da öz əksini tapıb: “Məlumat üçün bildirim ki, elə sahələr var ki, ekspertizanın bütün növləri özəldə cəmləşə bilməz. Həmçinin, özəl ekspertiza bahalı avadanlıqlar və məsuliyyət tələb edir. Bütün hallarda, Azərbaycanda özəl məhkəmə ekspertlərinin fəaliyyət göstərməsinin tərəfdarıyam. Onu da deyim ki, özəl məhkəmə ekspertizası ilə bağlı ayrıca qanunvericilik aktı qəbul olunmalıdır. Eyni zamanda, hansı ekspertiza növlərinin alternativ məhkəmə tibb ekspertizasına verilməsi müəyyən olunmalıdır. Bununla bağlı qanunvericiliyə bəzi dəyişikliklər əlavə olunmalıdır”.

Həmsöhbətimizin sözlərinə görə, özəl məhkəmə ekspertizasının yaradılmasına ehtiyac var. Qanun və normativ-hüquqi akt varsa, bu icra olunmalıdır. Məlumdur ki, məhkəmə ekspertizası mərkəzinin şəraitinin yaxşılaşdırılması üçün əlavə tədbirlər həyata keçirilir. Bununla yanaşı, özəl məhkəmə ekspertizasının təşkilinə də şərait yaradılmalıdır.

Günel CƏLİLOVA

Son xəbərlər