Adil Qeybulla: “Onkoloji xəstəliklərin xüsusi çəkisi uşaqlar arasında artmaqdadır”
Ölkəmizdə onkoloji xəstələrin sayı artıb. Nəinki ölkəmizdə, demək olar ki, dünyada onkoloji xəstələr getdikcə çoxalır. Bugünlərdə Azərbaycanda rəsmi qeydiyyatda olan onkoloji xəstələrin statistikası açıqlanıb.
Milli Məclisin deputatı Hicran Hüseynova parlamentin yaz sessiyasında çıxışı zamanı bildirib ki, Azərbaycanda uşaqlar arasında onkoloji xəstəliklər artıb: “Ölkədə onkoloji xəstəliklərin ümumi sayında müşahidə edilən artım dinamikası xüsusilə azyaşlılara aid göstəricilərdə özünü daha aydın göstərir. Son statistikalara əsasən, hazırda hər 100 min nəfərə 7,1 uşaq onkoloji xəstə düşür. Son 14 ildə uşaqlarda onkoloji xəstəliklərin sayının iki dəfə artması artıq uzunmüddətli və təhlükəli tendensiyanın formalaşdığını göstərir. Bu vəziyyət onkoloji xəstəliklərə qarşı mübarizənin sistemli şəkildə gücləndirilməsini, xüsusən də uşaqlar üçün ixtisaslaşmış tibbi xidmətlərin genişləndirilməsini tələb edir”.
Uşaqlar arasında onkoloji xəstəliyin nə səbəbdən artması barəsində fikir bildirən professor, tibbi ekspert Adil Qeybulla baki-xeber.com-a bildirdi ki, onkoloji xəstəliklər bütün yaşlarda olan insanlar arasında daha çox yayılıb: “Uşaqlar arasında onkoloji xəstəliklər artıb. Uşaqlar arasında onkoloji xəstəliklərin yayılan növləri qan xərçəngi, leykoz, leykemiya və sarkomadır. Beyin şişləri də bu növə daxildir. Uşaqlar arasında bu xəstəliyin artmasının səbəbi ekoloji səbəbdir. Bununla yanaşı, ölkə əhalisi sağlam qidalanmır, hazır qidalara üstünlük verir. Nəzərə almaq lazımdır ki, uşaqlarda immunitet sistemi çox zəifdir. Bu da uşaqlarda bu xəstəliyin yaranmasına şərait yaradır. Məlum səbəblər üzündən onkoloji xəstəliklərin xüsusi çəkisi uşaqlar arasında artmaqdadır. Həmçinin, nəsildən-nəslə keçən onkoloji xəstəliklər də var”.
Həmsöhbətimizin dediyinə görə, valideynlərin qeyri-sağlam həyat tərzi, onların hormonal preparatlar qəbul etməsi, düzgün olmayan qidalanması uşaqlarda törəmələrin əmələ gəlməsinə təsir göstərə bilər: “Bəzən uşaqlarda ana bətnində olarkən şişlər yaranır. Bunu ultrasəs müayinəsi zamanı görmək mümkündür. Bəzi onkoloji xəstəliklər ana bətnində olsa da körpə dünyaya gələndən sonra öz-özünə spontan olaraq reqressiya edə, yəni geriyə inkişaf edə bilər. Ana bətnində uşağa diaqnoz qoyulursa, yalnız körpə doğulandan sonra tədbirlər görülür”.
Günel CƏLİLOVA
