Abşeron rayonu, Masazır qəsəbəsində sakinlərin “Qır gölü” adlandırdığı ərazidə uzun illərdir davam edən problem yenidən gündəmə gəlib. Yerli sakinlərin sözlərinə görə, ərazidə çirkab suların gölə axıdılması nəzarətsiz şəkildə davam edir. Nəticədə göldə su səviyyəsi getdikcə yüksəlir və daşaraq ətraf yaşayış sahələrinə yayılır.
Baş verənlər bir neçə fərdi yaşayış evinin və təsərrüfat sahəsinin su altında qalmasına səbəb olub. Mövcud vəziyyət sakinlərin gündəlik həyatını ciddi şəkildə çətinləşdirib, normal yaşayış imkanlarını demək olar ki, tam məhdudlaşdırıb. Sakinlər bildirirlər ki, bəzi evlərdə yaşamaq artıq mümkün deyil və insanlar məcbur qalaraq evlərini tərk ediblər. Ərazidə yaranmış ağır vəziyyət xüsusilə yaşlılar və uşaqlar üçün böyük risk yaradır.
Abşeron RİH: “Məsələ daimi olaraq yerli icra nümayəndəliyinin və kənd bələdiyyəsinin nəzarətindədir”
Abşeron Rayon İcra Hakimiyyətindən baki-xeber.com-a verilən məlumatda bildirilir ki, Masazır kəndində “Qır gölü”nün ətrafında fərdi yaşayış evləri uzun illər bundan əvvəl tikilib: “Hazırda "Qır gölü"nün su səviyyəsinin artması son zamanlar havaların yağıntılı keçməsi və qrunt sularının qalxması ilə əlaqədardır. Məlumat üçün bildiririk ki, ərazidə mərkəzləşdirilmiş kanalizasiya sistemi mövcud deyil. Ətrafda yaşayan sakinlər çirkab sularını kustar üsullarla çəkilmiş borular vasitəsi ilə ya gölə axıdır, ya da "şambo" sistemindən istifadə edərək toplayırlar. Bu da son nəticədə qrunt sularının qalxmasına və ərazidə subasma hallarının yaşanmasına gətirib çıxarır. Ərazidə mərkəzləşdirilmiş su-kanalizasiya sistemlərinin çəkilməsi ilə bağlı aidiyyəti üzrə Azərbaycan Dövlət Su Ehtiyatları Agentliyinə (ADSEA) müraciətlər edilib. Məsələ daimi olaraq yerli icra nümayəndəliyinin və kənd bələdiyyəsinin nəzarətindədir”.
Pərvanə Mustafayeva: “Bu cür rütubətli mühitlər xroniki xəstəliklərdən əziyyət çəkənlər üçün xüsusilə təhlükəlidir”
Həkim Pərvanə Mustafayeva baki-xeber.com-a şərhində bildirdi ki, qrunt suların ətrafa dağılması gigiyenik baxımdan düzgün deyil: “Masazırda “Qır gölü” daşaraq ətraf ərazilərdə yaşayışı çətinləşdirib. Bu cür rütubətli mühitlər xroniki xəstəliklərdən əziyyət çəkənlər üçün xüsusilə təhlükəlidir. Belə yerlərdə müxtəlif mikroorqanizmlərin və göbələklərin inkişafı insan sağlamlığı üçün ciddi risk yaradır. Divarlarda göbələk və kifin əmələ gəlməsi, hətta az miqdarda olsa belə, orqanizmə mənfi təsir göstərir. Bundan əlavə, ventilyasiya şaxtaları olmayan binalarda boru xətlərinin zamanla çürüməsi baş verir ki, bu da öz növbəsində müxtəlif mikroorqanizmlərin yayılmasına şərait yaradır”.
Günel CƏLİLOVA
