Son dövrlər azyaşlı qızların məktəbə hicabla göndərilməsi cəmiyyətdə geniş müzakirələrə səbəb olub. Müzakirələrdə əsas diqqət məktəblərdə tətbiq olunan geyim kodeksinin qeyri-müəyyənliyinə yönəlir. Digər tərəfdən, məsələ hüquqi müstəvidə də müzakirə olunur.
“Uşaq hüquqları haqqında” qanun layihəsində qeyd edilir ki, uşaqların dini inanclara məcbur edilməsi yolverilməzdir. Bu müddəa uşağın seçim azadlığının və psixoloji inkişafının qorunmasını əsas götürür. Eyni zamanda, Milli Məclisdə müzakirəyə çıxarılan sənəddə valideynlərin və ya onları əvəz edən şəxslərin qarşılıqlı razılıq əsasında uşaqları öz dini əqidəsinə və dinə münasibətinə uyğun tərbiyə edə bilməsi hüququ da vurğulanır. Qanun layihəsində uşaqların dinə etiqad etməyə məcbur edilməsinin qadağan olunması müasir dövrün hüquqi çərçivələri baxımından əhəmiyyətli addım kimi qiymətləndirilir.
Maraqlıdır, məktəblərdə hicab qadağan ediləcək? Onu da bildirək ki, Azərbaycanda qanunvericiliklə hicab taxmaq birbaşa qadağan edilməsə də, "Təhsil haqqında" Qanuna əsasən məktəblərdə vahid məktəbli forması tətbiq olunur.
Elçin Əfəndi: “Hər hansı şəxsin dini ideologiyasından asılı olmayaraq, hamıya bərabər təhsil mühiti və imkanları yaradılıb”
Təhsil eksperti Elçin Əfəndi baki-xeber.com-a şərhində bildirdi ki, hər hansı şəxsin dini ideologiyasından asılı olmayaraq, hamıya bərabər təhsil mühiti və imkanları yaradılıb: “Valideyn və ya başqaları tərəfindən azyaşlılar, yəni 16-18 yaşdan aşağı şəxslər öz iradələrindən asılı olmayaraq müvafiq ideoloji təsir altına düşürsə, onlara təsir edən şəxslər hüquqi müstəvidə qanunvericiliyin tələbinə uyğun məsuliyyətə cəlb olunmalıdır. 5, 10 yaşında uşağı nəyəsə məcbur etmək, vadar etmək olmaz, onlara şəxsiyyət kimi yanaşmaq lazımdır. Bu istiqamətdə maarifləndirmə işinin həyata keçirilməsi üçün hər hansı qurum, struktur deyil, birbaşa cəmiyyət də maraqlı olmalıdır. Cəmiyyət nəyi hansı formada istədiyini bilməlidir. Bizim üçün vacib olan dünyəvi təhsil ala bilməyimizdir. İmkan verək ki, dövlətimiz, cəmiyyətimiz inkişaf etsin. Maarifləndirmə bütün dinlər üzrə aparılmalıdır, sadəcə islam dininə aid deyil”.
Tural İrfan: “Doğru maarifləndirmə olmalıdır ki, həm valideynlər, həm də uşaqlar dinin və qanunun sərhədlərini düzgün anlaya bilsin”
Ilahiyyatçı Tural İrfan baki-xeber.com-a şərhində bildirdi ki, orta məktəb və digər məcburi təhsil müəssisələrinin geyim qaydalarına uyğun hərəkət etmək qanunla tənzimlənir. Standart məktəb formasından imtina müəyyən inzibati məsuliyyət doğura bilər: “Bəzi dairələr iddia edir ki, məktəblərdə oğlan və qızların bir yerdə təhsil alması düzgün deyil, qızlar məktəbdən çıxarılmalı və tam örtülü – niqablı şəkildə gəzməlidir. Bu yanaşma dini yanaşma deyil və İslamın mahiyyətinə ziddir. Bir şagird öz seçimilə, anlayaraq hicaba üstünlük verirsə və bu geyim tərzi milli dəyərlərlə uzlaşırsa, ona da qadağa qoymaq doğru deyil. İnsanların geyim, yemək və digər şəxsi həyat məsələlərinə həddindən artıq müdaxiləsi cəmiyyətdə gərginlik yaradır. Doğru maarifləndirmə olmalıdır ki, həm valideynlər, həm də uşaqlar dinin və qanunun sərhədlərini düzgün anlaya bilsin”.
Günel CƏLİLOVA
