İlqar Hüseynli: “Biz daha çox bunda maraqlıyıq ki, Bilal Ərdoğan da öz investisiyasını Qarabağın bərpasına yatırsın”
Türkiyə Prezidenti Rəcəb Tayyib Ərdoğanın oğlu, İlim Yayma Vəqfinin Himayədarlar Şurasının sədri Bilal Ərdoğan Güngörən bələdiyyəsinin təşkil etdiyi “Bir sual - bir cavab” adlı tədbirdə gənclərin sualını cavablandırarkən Bakı şəhərində restoran açacağını deyib. Bu barədə mətbuat məlumat yayıb.
“...2009-ci ildə isə şəriklərimlə restoran biznesinə başladıq. Ortaqlarımızla müxtəlif restoranlarımız var. İl yarım öncə Dubayda bir restoran açmışıq. Bakıda da açmağı planlaşdırırıq...”
Qardaş ölkədən bura sərmayə gəlişi pis, deyil. Lakin daha yaxşı olmazdı ki, Bilal Ərdoğan Bakıda restoran biznesinə yox, azad olunmuş ərazilərdə infrastruktur tikintisinə sərmayə qoysun? Bu daha doğru olmazdı?
Ekspert İlqar Hüseynli baki-xeber.com-a bildirdi ki, B.Ərdoğan əslində Türkiyədə Gənclik və Təhsil Xidmətləri Vəqfinin (TÜRGEV) başında dayanır, eyni zamanda bir neçə vəqfə rəhbərlik edir.
“İş adamı kimi Bilal Ərdoğanın restoran biznesi var, o, Dünya Bankında təcrübə keçib, Amerikanın Boston şəhərində yerləşən Harvard universitetində təhsil alıb və sair.
Bir neçə il əvvəl Dubayda belə restoran açıb. Növbəti işininin Bakıda restoran açmaq olduğunu deyib. Amma nədən Bakıda restoran açır? Onların dini-ideoloji baxışlarında tamamilə başqa istiqamət olduğu halda niyə restoran biznesini önə çəkir? Hələ bilmək olmaz onun təyinatı necə olacaq? Yəni orada həm də spirtli içkiyə icazə verilib verilməyəcəyi kimi suallar gələcəyin suallarıdır. Dubayda mövcud olan restorana baxıb müşahidə etmək olar ki, bu restoranın yönü, istiqaməti necə olacaq? Yəni bir iş adamının başqa bir ölkədə restoran açması, yaxud hansısa bir sərmayə yatırımı etməsi, kapital qoyması tamamilə başa düşüləndir... Bilal Ərdoğan müəyyən səbəblərdən xarici ölkələrə yatırım etməkdə maraqlıdır. O, görünür Dubayı (BƏƏ) və Azərbaycanı Ərdoğan ailəsinə daha yaxın hesab etdiyinə görə ölkəmizi seçir. Yəni düşünür ki, mən toxunulmaz, rahat və prespektivli bir yatırımı ancaq Bakıda, Azərbaycanda edə bilərəm.
44 günlük Vətən müharibəsi dövründə Türkiyənin bizə mənəvi dəstəyini, qardaş dövlətin prezidenti Rəcəb Taib Ərdoğanın vaxtaşırı Qarabağa, Şuşaya, Xankəndinə səfərlərini, ona bağlı olan şirkətlərin Qarabağda quruculuq-bərpa işlərinə, nəhəng tunellərin çəkilmə prosesinə cəlb olunmasını, onların daha çox bu istiqamətə sərmayə yönətməsini müşahidə etdiyimizə görə məhz Bilal Ərdoğandan da gözləntimiz ondan ibarətdir ki, o Bakıda restoran biznesinə yox, Qarabağın bərpasına sərmayə yatırsın. O, Ağdamın, Xankəndinin, Şuşanın infrastruktur layhələrinin icrasında maraqlı olsun, bu daha yaxşı olar”.
İ.Hüseynlinin fikrincə, yaxşı olar ki, B.Ərdoğan eyni fəaliyyətləri Bakıda deyil, Ağdərədə, Qarabağın başqa yerlərində, Kəlbəcərdə, İstisuda, başqa azad ərazilərimizdə həyata keçirsin. “Bilal Ərdoğan yatırımyönümlü fəaliyyətini Qarabağın işğaldan azad olunmuş ərazilərində həyata keçirsin. Təbii ki, bunlar bizim gözləntilərimizdir. 44 günlük müharibədə qazandığımız qələbədən sonra məhz Ərdoğan ailəsinin və Türkiyənin Azərbaycanın Qarabağ bölgəsinə olan marağının, diqqətinin göstəricisi olaraq biz daha çox bunda maraqlıyıq ki, Bilal Ərdoğan da öz investisiyasını Qarabağın bərpasına yatırsın.
Azərbaycan Prezidenti İlham Əliyevin Qarabağın bərpasının və infrastruktur layhələrinin icrası istiqamətində xarici investorların cəlb olunması barədə çağrışları var. Prezident İlham Əliyev bu çağrışları hər zaman edir. Hesab edirəm ki, Prezidentimiz İlham Əliyevə dost olan Ərdoğan ailəsi biznes imkanlanı, sərmayələrini Qarabağın bərpası istiqamətinə yönəlsələr daha məqsədə uyğun, daha doğru seçim olar. Bu da Azərbaycan xaqlının, cəmiyyətinin onlardan gözləntisidir”-deyə İ.Hüseynli qeyd etdi.
İradə SARIYEVA
