Fərid Həşimov: “Sərnişin taksini dayanacaqda gözləməli və ya dayanacaqda düşməli olacaqsa, bu halda taksi xidmətinə ehtiyac qalmır”
“Bakıda sürücülər sərnişini mütləq binanın və ya ünvanın qarşısında düşürməyə çalışmamalıdır”.Bunu rəqəmsal inkişaf və nəqliyyat nazirinin müavini Rəhman Hümmətov "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı"nın 2025-ci il üzrə icrasına həsr olunmuş dəyirmi masada bildirib.
Onun sözlərinə görə, paytaxtda taksilərin sərnişinləri yalnız yol hərəkəti qaydalarına uyğun müəyyən edilmiş dayanacaq və məntəqələrdə mindirib-düşürməsi tələb olunur: "Şəhərdə sərnişinlərin minib-düşməsi üçün xüsusi nöqtələr artıq müəyyənləşdirilib və bu proses mərhələli şəkildə genişləndirilir. Dayanacaq yerləri əvvəlcədən planlaşdırılıb. Ehtiyac olan ərazilərdə əlavə məntəqələr yaradılır".
Əgər sərnişin rahat nəqliyyat vasitəsi kimi taksini seçirsə, həmin avtomobilin onu evinin qarşısından deyil, dayanacaqdan mindirməsi və ya düşürməsi ictimaiyyətin haqlı narazılığına səbəb olur. Sərnişin müəyyən məsafəni piyada qət etməli olacaqsa, bu halda taksi ilə avtobus arasında hansı fərq qalır?
Nəqliyyat eksperti Fərid Həşimov baki-xeber.com-a şərhində bildirdi ki, taksi fərdi xidmət vasitəsidir: “İşə və ya hər hansı bir ünvana gedən şəxs daha tez çatmaq və piyada getməmək üçün taksi xidmətindən istifadə edir. Sərnişin taksini evinin qarşısına çağırır və məkan olaraq həmin ünvanı göstərir. Əgər sərnişin taksini dayanacaqda gözləməli və eyni zamanda dayanacaqda düşməli olacaqsa, bu halda avtobusdan istifadə etməsi daha məntiqli olar. Belə olan halda taksi xidmətinə ehtiyac qalmır.
Əslində, bu yanaşmanın əsas məqsədi yol hərəkəti qayda pozuntularının, qəfil dayanma hallarının və tıxacların qarşısını almaq, həm sürücülər, həm də piyadalar üçün daha təhlükəsiz və nizamlı şəhər mühiti formalaşdırmaqdır. Bu fikir ilk baxışdan məntiqli görünsə də, praktikada müxtəlif problemlərə və ictimai narazılıqlara səbəb ola bilər”.
Günel CƏLİLOVA
