Elçin Əfəndi: “Şagirdlərin BSQ imtahanı üçün başqa tədris müəssisəsinə göndərilməsi düzgün hesab edilə bilməz”
Azərbaycan təhsil sistemində rəqəmsallaşma istiqamətində müəyyən işlər görülür. Ümumtəhsil müəssisələrində böyük summativ qiymətləndirmələr artıq adi bir prosedurdan çox məktəb həyatının mühüm mərhələsinə çevrilib.
BSQ-lər artıq ənənəvi qaydada deyil, elektron formada həyata keçirilir. Ancaq son günlər sosial şəbəkələrdə valideynlər məktəblərdə böyük summativ qiymətləndirmə (BSQ) yazmaq üçün şagirdlərin başqa məktəblərə göndərilməsindən narazılıqlarını bildirirlər. Valideynlərin sözlərinə görə, BSQ yazmaq üçün hər məktəbdə kompüter olmadığı üçün uşaqlar kompüteri olan digər məktəblərə aparılır. Nəticədə valideynlər öz cibindən taksi tutmaq məcburiyyətində qalırlar. Maraqlıdır, şagirdlərin digər məktəbə BSQ imtahanına göndərilməsi nə dərəcədə düzgündür?
Təhsil eksperti Elçin Əfəndi baki-xeber.com-a şərhində bildirdi ki, summativ qiymətləndirmənin keçirilməsi konkret olaraq şagirdin təhsil aldığı müəssisədə baş verməlidir. Ola bilər ki, hər hansı fənn üzrə summativ qiymətləndirmə zamanı suallar elektron formada təqdim olunsun: “Bu halda proses məktəbin informatika kabinetində həyata keçirilməlidir.
Paytaxt məktəblərinin demək olar ki, əksəriyyəti internetlə təmin olunub və kompüter avadanlıqları mövcuddur. Şagirdlərin BSQ imtahanı üçün başqa tədris müəssisəsinə göndərilməsi düzgün hesab edilə bilməz. Bu baxımdan valideynlərin narazılığı başa düşüləndir.
Əgər məktəb summativ qiymətləndirmənin elektron formada keçirilməsini öhdəsinə götürürsə, texniki təminat məsələsini də həll etməlidir. Bu cür problemlərin yaranması tədris prosesinin düzgün təşkil olunmadığını göstərir”.
Günel CƏLİLOVA
