Aslan Əsədov: “Qanunsuz parklanma halları ilə bağlı məsələlərə yenidən baxılması zəruridir”
Məlum olduğu kimi, nəqliyyat vasitələrinin parklanmasına görə ödənişlərin yığımı yalnız nağdsız qaydada, mobil tətbiq və SMS vasitəsilə həyata keçirilir. Sürücülər avtomobili park etdikdən dərhal sonra mobil tətbiqi açmalı və parklanmanın başladığını təsdiq etməlidirlər.
Əks halda sürücülərə qarşı cərimə tətbiq edilir. Yeni qanuna əsasən parklanma yerlərində “parkovşik”lərin dayanması qadağandır. Ancaq Bakı şəhərində dövlətin təşkil etdiyi parklanma yerlərində, xüsusən gecə saatlarında və bazar günləri “yaşıl jilet” geyinərək sürücülərdən pul tələb edən şəxslərə rast gəlmək mümkündür.
Nəqliyyat eksperti Aslan Əsədov baki-xeber.com-a şərhində bildirdi ki, şəhərin istənilən ərazisində parklanmanın təşkil olunmasının əsas meyarlarından biri parklanma sisteminə cəlb edilən nəqliyyat vasitələrinin ümumi rentabelliyinin və davamlılığının təmin edilməsidir: “Keçmişdə parklanmanın nəzarətsiz qaldığı, eləcə də əvvəlcədən müəyyən ərazilərdə qeyri-rəsmi şəkildə parklanmanın təşkil edildiyi hallar mövcud idi. Sonradan bu proses mərkəzləşdirilmiş və elektronlaşdırılmış sistemə keçidlə tənzimlənməyə başladı. Məlumat üçün deyim ki, hazırda bu sahəyə AYNA nəzarət edir. Lakin qeyd etmək lazımdır ki, AYNA tərəfindən təşkil edilən parklanma sistemi ilə əvvəl bu sahədə fəaliyyət göstərən şəxslər razılaşmır. Onlar iddia edirlər ki, əllərində müvafiq sənədlər mövcuddur və həmin sənədlərə əsasən müəyyən ərazilərdə parklanmanı təşkil etmək hüququna malikdirlər.
Məhz bu səbəbdən də gecə saatlarında və ya şənbə-bazar günləri “sarı jilet” geyinərək “parkovşik” kimi fəaliyyət göstərən şəxslərə rast gəlinir. Halbuki parklanmanın təşkili və bu sahəyə nəzarət yalnız AYNA tərəfindən həyata keçirilməlidir. Qanunsuz parklanma halları ilə bağlı məsələlərə yenidən baxılması zəruridir”.
Günel CƏLİLOVA
