Bakı şəhərinin Nizami rayonunda, Bəkir Çobanzadə küçəsində aparılan tikinti işləri ciddi ekoloji narahatlıq və ictimai etirazlara səbəb olub. Belə ki, “Orbita MTK” tərəfindən inşa edilən yaşayış binasının qaraj tikintisi məqsədilə ərazidə mövcud olan çoxsaylı ağacların kəsildiyi bildirilir.
Sakinlərin sözlərinə görə, tikinti prosesi zamanı yaşıllıq zolaqları faktiki olaraq məhv edilib və bu, ərazinin ekoloji durumuna ağır zərbə vurub.
Yerli əhali hesab edir ki, şəhər mühitində onsuz da məhdud olan yaşıllıq sahələrinin bu şəkildə məhv edilməsi təkcə estetik itki deyil, eyni zamanda insan sağlamlığı üçün real təhlükə yaradır.
Flora Hacıyeva: “Yaşıl soyqırım törədənlərə qarşı ciddi tədbirlər görülməlidir”
Ekoloq Flora Hacıyeva baki-xeber.com-a bildirdi ki, son illər Azərbaycan ərazisində dövlət vəsaiti hesabına geniş yaşıllıq zolaqları salınsa da, bəzi iş adamları və məmurlar bu yaşıllıqlara qənim kəsilirlər: “Bu vəziyyət hamıdan çox sakinləri narahat edir. İstənilən halda yaşıllığın nə səbəbdən məhv edilməsi araşdırılmalıdır. Yaşıl soyqırım törədənlərə qarşı ciddi tədbirlər görülməlidir. Prezident yaşıllıqların, meşələrin mühafizəsi ilə bağlı sərəncamlar imzalayır, tapşırıqlar verir. Prezidentin bütün sərəncamlarının, tapşırıqlarının icrasına ciddi nəzarət olunmalıdır”.
Nizami RİH: “Məsələ araşdırılır”
Məsələ ilə bağlı Nizami Rayon İcra Hakimiyyətinə də müraciət etdik. İcra hakimiyyətinin nümayəndəsi baki-xeber.com-a açıqlamasında bildirdi ki, məsələ hazırda araşdırılır.
Günel CƏLİLOVA
