Elçin Murad: “Bu qələmlərin satışına izin verilməsə, daha məqsədəuyğun olar”
Sosial şəbəkələrdə son günlər geniş yayılmış “köçürməyə kömək edən qələmlər” reklamları təhsil ictimaiyyətində narahatlıq yaradıb.
İmtahan zamanı asanlıqla istifadə oluna bildiyi iddia edilən bu vasitələr gənclər arasında sürətlə populyarlaşsa da, onların real təsiri və yaratdığı fəsadlar ciddi müzakirə mövzusuna çevrilib.
Bu cür texnologiyaların təşviqi tələbələrdə zəhmətsiz uğur anlayışını formalaşdıraraq, bilik əldə etmə prosesini ikinci plana keçirə bilər. Tələbələrin öyrənmək əvəzinə, texniki vasitələrə güvənmək tendensiyası həm fərdi inkişafı ləngidir, həm də təhsilin əsas məqsədlərini kölgədə qoyur. Onu da bildirək ki, bu məhsulun 10 gündən çoxdur ki, sosial şəbəkələrin Azərbaycan seqmentində (Instagram və TikTok) kütləvi reklamı, piarı aparılır.
Ümumiyyətlə, “şparqalka” kimi istifadə edilən qələmlərin satışı nə dərəcədə doğrudur?
Təhsil eksperti Elçin Murad baki-xeber.com-a şərhində bildirdi ki, qələm məsələsi şagird və abituriyentlərdə ümumi problem yaradan meyarlardan biridir: “Belə ki, bir neçə il qəbul imtahanı zamanı abituriyentlər yazılıb pozulan bilən qələmdən istifadə edirdilər. Həmin qələm də yüksək istilik şəraitində pozula bilir. Belə olan halda da abituriyentlərin bir çoxu bu qələmdən istifadə etdiyi üçün cavablar elan olunanda böyük bir problem yaşayır. İndi hal-hazırda köçürmə vasitəsi kimi istifadə olunan qələmlər müəyyən qədər DİM-in işini çətinləşdirə bilər. Yəni abituriyentlər (bəziləri) bu qələmi imtahan binasına keçirməyə cəhd edə bilərlər məhz köçürmək üçün. Belə hal baş verərsə həm imtahanın şəffaflığına xələl gəlmiş olar, həm də öz biliyi və savadı ilə imtahana qatılan abituriyentlərə haqsızlıq olar. Ona görə də, ümumiyyətlə, bu qələmlərin satışına izin verilməsə, daha məqsədəuyğun olar”.
Günel CƏLİLOVA
