İlqar Hüseynli: “Məmurların kobud davranışının səbəbləri cəzasızlıqdır, digər tərəfdən öz rəhbərinin mövqeyinə arxayın olmaqdır”
Bəzi məmurlar xalqın xidmətçisi olmaq, öz vəzifəsini layiqincə yerinə yetirmək əvəzinə neqativ işlərlə məşğul olur, əməyi, zəhməti ilə çörək qazanan vətəndaşa qarşı qeyri-insani rəftar sərgiləyir. Bir neçə gün əvvəl Sumqayıt İcra Hakimiyyətinin İstehsal və xidmət sahələri sektorunun məsləhətçisi Samir Bədəlovun vətəndaşa qarşı atdığı xoşagəlməz addım hələ də müzakirə olunur. Sosial şəbəkələrdə, mətbuat orqanlarında Sumqayıtda keçirilən reyd zamanı S.Bədəlovun satıcılardan birinin məhsullarını müsadirə etməsi, satıcıya “vətəndaşın hərəkət etdiyi səkidə məhsul satırsansa, bu, artıq sənin deyil, apar, qoy maşına...” deməsi ciddi tənqid olunur.
Məlumata görə, Sumqayıt Şəhər İcra Hakimiyyətinin başçısı Zakir Fərəcov şəhərdə keçirilən reyddə baş verən narazılıqla əlaqədar iclas keçirib.
Z.Fərəcov İcra Hakimiyyətinin İstehsal və xidmət sahələri sektorunun məsləhətçisi Samir Bədəlovu danlayıb və xəbərdarlıq edib.
Ekspertlər deyirlər ki, S.Bədəlovun davranışı yeganə nümunə deyil, onun kimi hərəkət edən məmurlar az deyil, bu da məmurların öz vəzifələrini layiqincə icra edə bilməməsi, daha doğrusu, o vəzifəyə layiq olmaması ilə bağlıdır.
Məmurun belə kobud səhvə yol verməsinin səbəbi nədir?Özü də icra məmurunun səhv edərək vətəndaşın əmlakınl qanunsuz zəbt etməsi, mənimsəməsi çox pis nümunədir. Bu nədən irəli gəlir ki, məmur belə hərəkətə yol verir?
““Onsuz da biz nə etsək də arxamızda böyük bir icra strukturu dayanır və hər şey edə bilərik” deyirlər”
Ekspert İlqar Hüseynli baki-xeber.com-a bildirdi ki, ilk növbədə küçə ticarətinin qanunvericilikdə əks olunub olunmamasına baxmaq lazımdır. O, vurğuladı ki, qanunvericiliyə görə, 6 dövlət qurumunun küçə ticarətində əhalinin məşğul olmasına icazə vermək səlahiyyəti var. İ.Hüseynlinin sözlərinə görə, buna icazə verən qurumlardan biri icra hakimiyyətləridir, biri İqtisadiyyat Nazirliyidir, biri bələdiyyələrdir və sair. “Söhbət qanunla icazə verilən yerdən gedir. Əgər qanunsuz küçə ticarəti varsa və hansısa bir dövlət qurumu reydlər zamanı belə hallara rast gəlirsə sadəcə olaraq həmin yerdə ticarətlə məşğul olmağın yasaq olduğu mikro sahibkara, vətəndaşa proflaktik olaraq izah etməlidir. Bu vətəndaşa izah olunduqdan sonra inzibati tədbir yalnız ondan ibarət ola bilər ki, oradan onun məhsulları özü tərəfindən yığışdırılaraq istədiyi yerə aparsın. Vətəndaşa bununla bağlı tövsiyyə xarakterli fikir bildirmək olar. Bu vəziyyətdə isə ümumiyyətlə bizim dediyimiz qanunla nəzərdə tutulan halların heç biri yoxdur. Birincisi, biz məsələtə Sumqayıt olayı ilə bağlı yanaşsaq orada məmur alma qutularını səkiyə qoyan sahibkara deməli idi ki, o məhsulları dükanın içərisinə qoysun. Burada küçə ticarətindən söhbət getmir, meyvə-tərəvəz alveri ilə qanuni məşğul olan bir dükandır. Sadəcə olaraq bir neçə qutu məhsulunu dükanının qarşısındakı səkiyə qoyub. Ona başa salmaq lazım idi ki, səkinin üstünə məhsul qoymaq, səkini tutmaq olmaz. Ondan tələb olunmalı idi ki, o məhsulu dükanının içinə qoysun. Amma biz orada bu halları müşahidə etmədik. O məhsulların səkiyə qoyulması qanunsuzdurmu? Əgər vətəndaşların gediş-gəlişinə mane olursa bu qanunsuzdur. Yəni o məhsulları səkiyə qoymaq olmaz. Biz orada nəyi müşahidə etdik? Qanunsuz hərəkətin icraçısı olaraq biz icra hakimiyyətinin nümayəndəsini, o qoçunu müşahidə etdik. Çünki onun hərəkəti qanunla təsbit olunmuş hüquq deyildi ki, icra hakimiyyətinə verilsin. Bu sadəcə olaraq qoçuluq idi, hərbə-zorbalıq idi. Onun o məhsulları götürüb öz maşınına qoydurub özü ilə aparmasına heç bir qanun icazə vermir. O məmurun vətəndaşın malını müsadirə etmək haqqı-hüququ yoxdur...”
İ.Hüseynli qeyd etdi ki, bəzi məmurların bu cür kobud davranmasının başlıca səbəbi cəzasızlıq mühitidir: “Məmurların kobud davranışının səbəbləri cəzasızlıqdır, digər tərəfdən öz rəhbərinin mövqeyinə arxayın olmaqdır. Əgər məmur fikirləşirsə ki, onun rəhbəri olduğu qurum kifayət qədər güc arsenalına malikdir və o hər şeyi edə bilər. Bundan dolayı icra hakimiyyətlərinin gücünə olan o arxayınçılıq var, icra hakimiyyətləri barədə “onlar hər şey edə bilər” kimi təsəvvür formalaşıb. Yəni “onsuz da biz nə etsək də arxamızda böyük bir icra strukturu dayanır və hər şey edə bilərik” deyirlər. Bu arxayınçılıq, vətəndaşlara qarşı baş verən sayğısızlıq, daxilindəki təkəbbür, vəzifə səlahiyyətlərindən sui-istifadə-səbəblər bunlardır. Məmurun belə kobud hərəkətə yol verməsinin səbəbləri sırasında bunlardan başqa heç nə görə bilmirəm. Eyni zamanda insanın daxilində olan eqozim, psixoloji emosional gücə hakim olma kimi psixi pozğunluq, bütün bu faktorlar təsir edir ki, məmur bu hərəkəti etsin. Bir də ki, Sumqayıtdakı həmin məmur ilk dəfə deyil belə kobud hərəkət edib. Sumqayıtda ticarətçilərə qarşı onun aqressiv davranışını tez-tez müşahidə edirik. Sosial şəbəkələrdə onun haqqında belə materaillar yayımlanır. Bu son hadisədə daha aqressiv davranış sərgiləyib”-deyə İ.Hüseynli qeyd etdi.
İradə SARIYEVA
