Bazarlarda satılan kələm turşularının rənginin qırmızı olması üçün süni boyalardan istifadə edildiyi iddia olunur. Bununla bağlı sosial şəbəkələrdə görüntülər yayılıb.
Paylaşılan videolarda bildirilir ki, kələm turşusunun daha tez yetişməsi və qısa müddətdə qırmızı rəng alması üçün İrandan gətirilən xüsusi boya maddəsi istifadə olunur. İddialara görə, bu maddənin təsiri ilə kələm cəmi üç gün ərzində hazır turşu formasını alır.
Qeyd edək ki, kələm turşusunun qırmızı rəng olması üçün təbii çuğundurdan istifadə olunur. Maraqlıdır, təbii çuğundur kimi sağlam və əlçatan alternativ olduğu halda, niyə süni boyalara üstünlük verilir?
Eyyub Hüseynova: “Bazarda satılan turşularda qida üçün nəzərdə tutulmuş boyalardan istifadə edilməsi istisna olunmur”
Azad İstehlakçılar Birliyinin (AİB) sədri Eyyub Hüseynov baki-xeber.com-a şərhində bildirdi ki, bazarda satılan turşularda qida üçün nəzərdə tutulmuş boyalardan istifadə edilməsi istisna olunmur: “Əgər həmin boyalar tez yetişdirmə funksiyasına malikdirsə, turşuların qırmızı rənglə boyanması ehtimalı mümkündür. Məhsul istehlakçıya təbii şəraitdə, çuğundur vasitəsilə boyandığını iddia edilərsə, bu, istehlakçı hüquqlarının pozulması və aldadılması deməkdir. Bu haldan şübhələnən şəxs dərhal Azərbaycan Qida Təhlükəsizliyi Agentliyinə məlumat verməlidir”.
Məhsəti Hüseynova: “Turşu fermentasiya olunmuş məhsuldur və ora sintetik-kimyəvi maddə daxil olduqda onun zərəri daha da artır”
Qida təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova baki-xeber.com-a şərhində bildirdi ki, E122 kodu ilə tanınan azorubin boyaq maddəsi qida və qeyri-qida məhsullarında rəngverici kimi istifadə olunur: “Avropa Birliyi tərəfindən bu maddə ilə bağlı risk faktoru aşkar edildiyinə görə, bəzi ölkələrdə onun istifadəsi qadağan olunub. Lakin bəzi ölkələrdə istifadəsinə hər hansı məhdudiyyət qoyulmayıb. Məlumat üçün qeyd edim ki, bu maddə normadan artıq istifadə edildikdə xroniki xəstəlikləri olan insanlarda xəstəliyin kəskinləşməsinə, uşaqlarda hiperaktivliyə, həzm sisteminin pozulmasına səbəb ola bilər. Həmçinin allergiya və dəridə səpki halları da müşahidə edilə bilər. Yaxşı olar ki, məhsul alınarkən etibarlı mənbələrə üstünlük verilsin. Xüsusilə bu maddənin kələm turşusunda istifadəsi olduqca təhlükəlidir. Nəzərə almaq lazımdır ki, turşu fermentasiya olunmuş məhsuldur və ora sintetik-kimyəvi maddə daxil olduqda onun zərəri daha da artır”.
Günel CƏLİLOVA
