Şəmsəddin Əliyev: “Üzərində qatlanan bıçaq gəzdirən yeniyetmələrin ailə mühitinə nəzər saldıqda bir çox məqamlar aydın olur”
Son illərin statistikasına nəzər salsaq görərik ki, qətl hadisələrinin böyük hissəsi bıçaqla, xüsusilə də cib bıçağı ilə törədilib. Məhz bu səbəbdən, Milli Məclisin komitə iclasında cib bıçaqlarının satışının qadağan edilməsi təklifi diqqət mərkəzinə gəlib.
Maraqlıdır, cib bıçaqlarının satışının qadağan edilməsi cinayət hallarının azalmasına real təsir göstərə bilərmi, yoxsa problem daha başqa səbəblərlə bağlıdır?
"Polisə Dəstək” İctimai Birliyinin sədri Şəmsəddin Əliyev baki-xeber.com-a bildirdi ki, Milli Məclisdə məsələnin bu cür qoyulması təqdirəlayiq haldır: “Son zamanlar cib bıçaqları ilə törədilən hadisələr ictimaiyyətdə narahatlıq yaradıb. Bu səbəbdən də qatlanan bıçaqların dükanlarda sərbəst şəkildə satışı arzuolunan deyil. İlk olaraq qeyd edim ki, valideyn məsuliyyətinin artırılması, orta məktəblərdə təlim-tərbiyə işlərinə nəzarətin gücləndirilməsi önəmlidir. Ötən il məhz bu bıçaqlarla ölkənin bir sıra bölgələrində xoşagəlməz hadisələr baş verib. Cib bıçaqlarının satışının qadağan edilməsi cinayət hallarının qarşısını tam almayacaq, lakin müəyyən nəzarət mexanizmi formalaşdıracaq”.
Ekspert hesab edir ki, üzərində qatlanan bıçaq gəzdirən yeniyetmələrin ailə mühitinə nəzər saldıqda bir çox məqamlar aydın olur: “Zənnimcə, dövlət qurumları bu istiqamətdə daha geniş işlər görməlidir. Orta məktəb mühafizəçiləri məktəbə daxil olan şagirdlərin üzərini və çantalarını daha diqqətlə yoxlamalıdırlar. Qatlanan və ya tiyəsi uzun olan bıçaqlar, eləcə də digər kəsici və deşici vasitələr müsadirə edilməli, bu barədə valideynlərlə müvafiq söhbətlər aparılmalıdır. Eyni zamanda dükanlarda yeniyetmələrə bu cür vasitələrin satışı qadağan edilməlidir”.
Günel CƏLİLOVA
