Aydın Əliyev: “Onkoloji xəstələrin özəl klinikalardan üz çevirməsi...”
Onkoloji xəstəliklərin geniş yayılması ölkədə bəzi özəl klinikaların əlinə fürsət verib və onlar da bu xəstəliyin müalicəsi ilə məşğul olmağa başlayıblar. Amma müşahidələr göstərir ki, özəl klinikalar bir neçə onkoloqu bu prosesə cəlb etsələr də, istədikləri nəticəni əldə edə bilmirlər. Onkoloji xəstəliklərin müalicəsi olduqca ağır bir prosesdir və bu işin mərkəzləşdirilmiş xəstəxanada həyata keçirilməsi daha effektiv nəticələr ortaya qoyur. Bu xəstəliyin müalicəsinin hədsiz baha olduğu da faktdır. Özəl klinikalarda da bu prosesurlar daha baha qiymətə başa gəlir.
Məsələn, elə xəstələr var ki, əvvəlcə Milli Onkologiya Mərkəzində müalicə olunub, sonra hansısa xəttlə özəl müəssisəyə gedib, amma orada istədiyi nəticəni əldə etməyib, təkrar Mərkəzə qayıdıb. O xəstələr də deyirlər ki, özəl klinikalarda həm lazımı avadanlıqlar yoxdur, həm qiymətlər bahadır, həm də orada daha çox xəstəni əməliyyat etməyə maraq göstərilir, özü də çox baha qiymətə.
Tibb elmləri doktoru, professor Adil Qeybulla da mətbuata açıqlamasında bu məsələyə münasibət bildirib və onkoloji xəstəliklərin özəl klinikalarda müalicəsinin risqli olduğunu deyib: “Hazırda onkoloji xəstələrin müalicəsi Milli Onkologiya Mərkəzində həyata keçirilir. Respublikada onkoloji xəstələrin müalicəsinin mühüm tərkib hissəsi hesab olunan radioterapiya yalnız Onkologiya Mərkəzindədir. Belə olan halda, xəstələrin ayrı-ayrı yerlərdə epizodik müalicə alması məqsədəuyğun deyil.
Nə qədər ki, özəl klinikalar müalicə və müayinə imkanlarına tam yiyələnməyib, belə addımın atılması qeyri-düzgündür. İkincisi, onkoloji xidmətlərin özəl klinikalarında həyata keçirilməsi üçün birinci növbədə, onkoloji xəstələrə təcili yardım mülkiyyət formasından asılı olmayaraq, istənilən klinikada icbari tibbi sığorta çərçivəsində olmalıdır. Məsələn, belə xəstəyə qanaxma, katertrın qoyulması, drenajın çıxarılması yaxud həyat keyfiyyətinə bağlı hər hansı prosedurun aparılması icbari tibbi sığorta paketinə daxil edilməlidir”.
Professor həmçinin vurğulayıb ki, onkoloji xəstələrin müalicəsi baxımından əsas yer Milli Onkologiya Mərkəzi olmalıdır:
“Amma onkoloji xəstələrin peşəkar müalicəsi üçün diaqnostika, müayinə və prosedurların Milli Onkologiya Mərkəzində aparılması daha məqsədəuyğundur. Respublikada yeganə Pozitron Emissiya Tomoqrafiya (PET) Milli Onkologiya Mərkəzinin yanındakı Nüvə Təbabəti Mərkəzindədir. Ona görə də, bu mərkəzin imkanlarının istənilən bir klinikadan daha yüksək olduğu üçün, hesab edirəm ki, onkoloji xəstələrin müalicəsi baxımından əsas yer Milli Onkologiya Mərkəzi hesab edilməlidir”.
Mətbuat yazır ki, bu il onkoloji xəstəliyə tutulmuş şəxslərin müalicəsinin və reabilitasiyasının həyata keçirilməsi, dərman preparatlarına olan tələbatın ödənilməsi və bu sahənin maddi-texniki bazasının gücləndirilməsinə 118 milyon manat vəsait yönəldiləcək.
Professorun da sözlərindən aydın görsənir ki, özəl klinikalar müalicə məsələsində lazımı imkanlara malik deyil. Bu baxımdan, onkoloji xəstələrin öz həyatlarını bu müəssisələrə etibar etməsi risqlidir.
Bəzi mütəxəssislər hesab edirlər ki, maddi-texniki bazası, eləcə də bir sıra digər tələb olunan imkanları yetərli olmayan özəl klinikalardan onkoloji xəstələr imtina edə bilər. Bir halda ki, onlar tələb olunan müalicəni ala bilmirlər, onda onlar daha çox aidiyyəti dövlət tibb müəssisələrinə üz tutacaqlar. Ekspertlər deyirlər ki, onkoloji xəstəliyin geniş yayılması özəl klinikalar üçün imkan açıb və onlar da xəstələri cəlb edirlər, bahalı müalicələrin isə xeyri olmur. Ekspertlər onu da deyir ki, özəl klinikaların bu xəstəliyi müalicə etmək imkanları məhdud olduğu üçün bu sahədə müalicə işi aparmaq onlara qadağan oluna bilər, yaxud olunmalıdır.
Azərbaycan Tibb Universitenin dosenti, həkim formokoloq Aydın Əliyev baki-xeber.com-a bildirdi ki, bu gün Azərbaycanda Səhiyyə Nazirliyi, TƏBİB, dövlət və özəl müəssisələrin arasında onkoloji xəstələrlə bağlı müəyyən problematik vəziyyətlər yaranır. “Tibbdə istifadə olunan istənilən metod şərt deyil ki, bütün xəstələrə istifadə olusun. Ona görə də xəstəliklərin gedişatından aslı olaraq xəstələr ayrı-ayrı yerlərdə müalicə ala bilərlər. Yaxşı olardı ki, onkoloji xəstələri qəbul edən bütün səhiyyə müəssisələrində radioterapiya olardı. Bunun olması faydalı olardı. İşin təşkili məsələsidir əsas. O fikirlə razıyam ki, bəli, hələlik bizim səhiyyənin bir neçə qurum tərəfindən idarə olunması probelmlər yaradır. Bu səbəbdən də təşkilati işlərlə əlaqədar problemlər mövcuddur. Bunu danmaq olmaz.
Onkoloji xəstələrin özəl klinikalardan üz çevirməsi, imtina etməsi onların öz şəxsi işidir. Əgər xəstənin müraciət etdiyi müəssisədə bütün şöbələr varsa təbii, o xəstənin həmin yerdə müalicə olunmaq hüququ var ki...”
A.Əliyev hesab edir ki, onkoloji xəstələrin özəl, yaxud dövlət tibb müəssisəsində müalicə olunması onun öz seçimidir.
İradə SARIYEVA
