Məhərrəm Zülfüqarlı: “Bu kimi hallar təxribatdır”
Azərbaycanda dini etiqad azadlığının və tolerantlıq mühitinin olması müsbət bir nümunə kimi beynəlxalq aləmdə təqdir edilir. Ölkəmizdə heç bir dinin, təriqətin mənsubuna qarşı hər hansı bir mənfi yanaşma yoxdur. Hər kəs öz dinini təbliğ edir, dini məbədində ibadətlə məşğul olur. Amma çox təəssüflər olsun ki, bəzi dini sektaların təmsilçiləri bu tolerantlıq mühitindən sui-istifadə edərək öz sektalarının təbliğatı ilə məşğul olurlar. Xüsusən də ictimai yerlərdə, parklarda, avtobus və metroda belə hallarla rastlaşmaq olur. Azərbaycan dilində səlist danışan missionerlər öz sektalarının təbliğatına aid vərəqələr, bukletlər, şəkilli jurnallar paylayır. Deyə bilərsiz ki, burada pis nə var, insanlar doğru yola dəvət edilir. Burada söhbət doğru yola dəvətdən getmir, yeniyetmə və gəncləri bu sektalara cəlb etməkdən gedir.
Son günlər Yehovanın Şahidləri sektasının üzvləri xeyli fəallaşıblar. Onlar mərkəzi yerlərdə, parklarda və sairdə bukletlər paylayırlar. Üzərində “Yehovanın Şahidləri sizinlə müqəddəs kitab danışmağa şad olacaqlar. Məni ziyarət edin. Onlayn blank doldurun və biz sizə münasib olan vaxtda və məkanda sizinlə görüşəcəyik. Yaxud xahişlərinizi Yehovanın Şahidlərinə göndərin” və başqa ifadələr yazılan bukletlər” yayılır.
“Məqsədləri odur ki, daha çox azərbaycanlını öz təsirləri altına salıb sıralarına cəlb etsinlər”
Tarix elmləri doktoru, professor Məhərrəm Zülfüqarlı həmin bukletlərin fotosunu baki-xeber.com-a təqdim edərək bildirdi ki, xristian missionerlər bu cür vərəqlər paylayırlar. O, qeyd etdi ki, bukletləri Koroğlunun heykəlinin ətrafında bir azərbaycanlı qadının yaydığının şahidi olub. “Azərbaycan dövlət müstəqilliyini bərpa etdikdən sonra demokratikləşmə yolu tutdu və bundan dini mərkəzlər sui-istifadə etməyə başladılar. Xüsusən də xristian missionerləri. Yəni Birinci Qarabağ Müharibəsi dövründə xristian təşkilatların müsəlman ölkəsində bu cür iş aparması tamamilə təxribat idi. Hətta 2000-ci ildə yunan kilsə başçıları gəlib mərhum Prezident Heydər Əliyevlə görüşmüşdü. Bildirirdilər ki, Azərbaycan Yunanıstana qaz verirsə icazə verin biz də Qız Qalasının yanında bir kilsə tikək. Guya I əsrdə burada İsa peyğəmbərin göndərdiyi missionerlərdən birinin dərisi soyulub, onun şərəfinə burada kilsə tikdirək. Heydər Əliyev əlbəttə ki, buna razı olmadı.
Mən özüm görmüşəm, AzTV-də Bakı ilə bağlı rus dilində bir film göstərdilər. Həmin dediklərim o filmdə var ki, I əsrdə belə hadisə olub. Bu kimi hallar təxribatdır. Azərbaycanda da işsizliyin olduğu bir vəziyyətdə missionerlər Azərbaycan ailələrini öz sıralarına cəlb edirlər. Belə vərəqlər yayıb insanları özlərinə çəkməklə onları mənəviyyatsızlaşdırırlar. Bu missionerlərin məqsədləri odur ki, daha çox azərbaycanlını öz təsirləri altına salıb sıralarına cəlb etsinlər.
Yəni biz özümüzü müsəlman hesab etsək də, əksəriyyət SSRİ dövründə gəlmə ailələr olduğuna görə müsəlman dini onlarda güclü deyil. Belə bir vəziyyətdə də inancı zəif olanlar bu təxribatlara uyurlar. Bu sektalar maddi cəhətdən onlara kömək təklif edirlər. Missionerlərin təsirinə düşənlərə maddi yardım verilir, onlar pulsuz ərzaqla təmin olunur. Bunun da da müqabilində sekta üzvü olan azərbaycanlılar bu təbliğatı aparırlar.
Hətta özüm bunun şahidi olmuşam. Bizim evin qarşısında milliyətcə rus olan iki qadına yol vermişəm və onlarla bir az şirin danışmışam, səhərisi gün gəlib qapımızı döyüblər əllərində də bu cür təbliğat bukletləri. Mən onları mədəni şəkildə başa salıb yola salmışam. Amma bilirsiz ki, əksəriyyətin təsir altına düşmək ehtimalı var”.
M.Zülfüqarlının sözlərinə görə savadı az olanlar, siyasəti bilməyənlər belə missionerlərin toruna asanlıqla düşə bilirlər. M.Zülfüqarlının fikrincə, bu kimi məsələlərdə ayıq olmalıyıq və xalqımızı, cəmiyyətimizi başa salmalıyıq ki, bu cür təxribatlara uymasınlar.
İradə SARIYEVA
