Aslan Əsədov: “Taksilərə icazə verilən ərazilərin onların rentabelliyinə uyğun olub-olmaması zamanla özünü göstərəcək”
Taksiyə buraxılış kartı və fərqlənmə nişanı hansı ərazidən alınırsa, sürücü yalnız həmin yerdə işləyə bilər. Bununla bağlı məlumat sosial şəbəkələrdə paylaşılıb.
Sürücülər deyirlər ki, artıq xeyli müddətdir yalnız paytaxt ərazisindən sifariş alırlar. Ekspertlər hesab edir ki, ərazi üzrə məhdudiyyət sürücülərin gəlirlərinə də mənfi təsir göstərəcək və bu cür məhdudiyyətlər rəqabətin azalmasına səbəb ola bilər.
Belə ki, sürücü sərnişini başqa rayona apardıqdan sonra geri qayıdarkən sifariş qəbul edə bilmirsə, bu, boş gediş deməkdir və nəticədə qazanc azalır.
Maraqlıdır, ərazi üzrə məhdudiyyət taksi bazarına necə təsir edəcək?
Nəqliyyat eksperti Aslan Əsədov “Bakı-Xəbər”ə şərhində bildirdi ki, taksilər şəhər nəqliyyatının inkişafında mühüm paya malikdir. Nəqliyyat vasitələrinin rentabelliyi baxımından bu istiqamətdə müəyyən işlər görülür: “Məlumdur ki, buraxılış kartı əsasən Bakı ərazisində tətbiq olunur. Bakıətrafı qəsəbələrdə həmin icazə kartının qüvvədə olduğu və olmadığı ərazilərdə taksi qiymətlərində artım müşahidə edilə bilər. İlk növbədə, taksi xidmətinin rentabelliyini və fəaliyyət prinsipini öyrənmək lazımdır. Məsələn, bayram günlərində, eləcə də şənbə-bazar günləri taksilərə təlabat artır. Bu günlərdə taksiyə ehtiyac daha qabarıq şəkildə özünü göstərir və göstərəcək”.
Həmsöhbətimiz onu da əlavə etdi ki, taksilərə icazə verilən ərazilərin onların rentabelliyinə uyğun olub-olmaması zamanla özünü göstərəcək. Bütün bu məsələlər müəyyən şərtlər çərçivəsində həyata keçirilməlidir: “Şərtlərin prinsipinə əməl edilməzsə, alternativ yollar haqqında fikirləşilməlidir”.
Günel CƏLİLOVA
