İlqar Hüseynli: “Vətəndaşlarla bu cür rəftar edən məmurlara qarşı xüsusi tədbirlər görülməlidir”
Bu günlərdə Sumqayıt Şəhər İcra Hakimiyyəti nümayəndəsinin küçə ticarətilə məşğul olmaq istəyən şəxsin məhsulunu müsadirə etməsi, kobud, qaba rəftarı sosial şəbəkələrdə kəskin etiraz doğurub.
İcra nümayəndəsinin şəxsə yaxınlaşaraq özünü təqdim etmədən “Bura vətəndaşın yoludur, alma satmaq üçün yer deyil. Bunu səkidə satırsansa, sənin deyil. “Vsyo”, qoyun bunları maşına!” söyləməsi insan hüquqlarının kobud pozuntusu, məmur özbaşınalığı kimi dəyərləndirilir.
Maraqlıdır, icra nümayəndəsinin vətəndaşın malını müsadirə etmək hüququ varmı?
Sosial sahə üzrə ekspert İlqar Hüseynli baki-xeber.com-a şərhində bildirdi ki, icra nümayəndəsinin vətəndaşla rəftarı olduqca kobud və məmura yaraşmayan davranışdır. Bu hal qanun pozuntusu hesab olunur: “Məlumdur ki, səyyar satışa, küçə ticarətinə razılıq verən dövlət qurumları var. Ancaq məlum hadisə zamanı bəlli oldu ki, meyvə-tərəvəz dükanının sahibi küçə ticarəti ilə məşğul olmurdu. O, sadəcə satdığı məhsulun bir qismini öz dükanının qarşısındakı səkiyə qoymuşdu. Həmin dükanın sahibinə nəzakət qaydalarını qorunaraq izah edilməli idi ki, məhsul dükandan kənar ərazidə satıla bilməz, çünki bu hal insanların gediş-gəlişinə, hərəkətinə mane olur. Lakin biz fərqli davranış qaydaları gördük ki, bu da hal insan hüquqlarının pozulması deməkdir. İcra nümayəndəsinin məlum davranışı insanların etirazına səbəb olub. “Bura vətəndaşın yoludur, alma satmaq üçün yer deyil. Bunu səkidə satırsansa, sənin deyil. “Vsyo”, qoyun bunları maşına!” ifadələr işlətməsi “qoçuluq” sayılır. Hesab edirəm ki, vətəndaşlarla bu cür rəftar edən məmurlara qarşı xüsusi tədbirlər görülməlidir”.
Günel CƏLİLOVA
