Adil Qeybulla: "İnyeksiyadan evdə hər hansı bir anafilaktik şok olacaqsa, insan onun qarşısını necə ala bilər?"
Evdə iynə vurmaq, inyeksiya prosesi qadağan olunub. Bu yaxınlarda TƏBİB-in icraçı direktoru Vüqar Qurbanov tibb bacılarının evdə iynə vurmasına icazə olmadığını bildirib. Ancaq bu qadağa tibb bacılarının narazılığına səbəb olub.
Onların fikrincə, TƏBİB-in bu qərarında mütləq düzəlişlər olmalıdır: "Bəziləri yataq xəstəsidir və iynə üçün xəstəxanaya getməsi praktiki olaraq mümkün deyil. Bəzi xəstələr lift olmadan, çətinliklə hərəkət edirlər. O xəstələr gündə iki dəfə necə tibb müəssisəsinə gedə bilərlər? Bu baxımdan, tibb bacısının evə gedib xidmət göstərməsi həm praktik, həm də zəruridir”.
Mövzu ilə bağlı fikir bildirən professor, tibbi ekspert Adil Qeybulla baki-xeber.com-a bildirib ki, dünyanın heç bir yerində evdə hansısa inyeksiya etmək, venadaxili sistem dediyimiz infuziyalar aparmaq icazəli deyil: "Əgər belə bir hal baş verərsə və bundan bir ağırlaşma da olarsa, bu, çox ciddi hüquqi məsuliyyət yarada bilər. Ona görə də dünyada belə bir şey yoxdur. Bizdə də olmamalıdır. Tibb bacısı tapıb evdə sistem köçürtməyə biz uzun müddətdir adət etmişik. Bu şeylər, əslində, dayandırılmalıdır. Evdə inyeksiyalar və infuziyalar aparmağın neqativ tərəfləri odur ki, burada sterillik, aseptika, antiseptika qaydalarının necə gözlənildiyi bilinmir. Tibb bacılarının böyük əksəriyyəti hal-hazırda - niyə böyük əksəriyyəti deyirəm - onların hətta tibb məktəblərində oxuyanlarının da bəzən görürsünüz ki, kifayət qədər nəzəri savadları yoxdur. Böyük əksəriyyət də gedib oradan-buradan müxtəlif idarələrdən yalançı diplomlar alırlar, guya ki, üç aylıq kurs və s. keçiblər. O diplomların heç bir hüquqi qüvvəsi yoxdur. Yəni bunları Səhiyyə Nazirliyi, digər qurumlar tanımır, Elm və Təhsil Nazirliyi tanımır, tanıya da bilməz. Ona görə də bu məsələ çox ciddidir.
Əgər bu inyeksiyadan evdə hər hansı bir anafilaktik şok olacaqsa, insan onun qarşısını necə ala bilər? Ona görə də antibiotikdən, digər dərmanlardan evdə ölüm halları xeyli var. Hətta stasionarda bəzən bunun qarşısını almaq çətin olur, nəinki evdə. O baxımdan da mən düşünürəm ki, bunun artıq vaxtıdır ki, evdə inyeksiyalar və infuziyalar olunmasın".
Günel CƏLİLOVA
