Tural İrfan: “Dənizin çəkilməsi ilə çoxlu qıfılların üzə çıxması və ya su kanallarından bu tip əşyaların tapılması cadu inancı ilə bağlıdır”
Dəniz təkcə məişət tullantıları ilə deyil, həm də çirkin əməllər nəticəsində pislənir. Bəzi adamlar dənizi cadu, əməllərlə çirkləndirir. Üstü yazılmış kağızlar, qıfıl, yumurta və s. Son zamanlar dənizin geri çəkilməsi nəticəsində Xəzərə cadu məqsədi ilə atılan qıfıllar üzə çıxıb.
Qeyd edək ki, inanclara görə qıfıl niyyətin "bağlanması" rəmzi kimi təqdim olunur.
Belə təsəvvürlərdə qıfıl bir insanın qismətinin, yolunun və ya münasibətinin bağlanmasını simvolizə edən obyekt kimi xatırladılır. Bu yanaşma real praktikadan çox, folklor və mifoloji düşüncə tərzinin bir hissəsi hesab olunur.
İlahiyyatçı Tural İrfan baki-xeber.com-a şərhində bildirdi ki, dənizin çəkilməsi ilə çoxlu qıfılların üzə çıxması və ya su kanallarından bu tip əşyaların tapılması cadu inancı ilə bağlıdır. Sosial problemlərin artması, ictimai əxlaqın məhdudlaşması və savadsızlığın çoxalması adamları cadugərlərin ağuşuna atır: “Təhsil adı ilə diplom almaq savadlı olmaq deyil. Demək cəmiyyətin çoxu təhsilli olsa da savadsızdır. O qıfılları bağladıb ora atdıranların bəlkə də hamısı ali təhsilli adamlardır. Cadu və sehr dində haramdır. Onunla məşğul olmaq günahdır. Amma bunun üçün gərək insanlara maarifləndirmə aparılsın. Bu da din xadimlərinin işidir. Onlar isə tamamilə başqa işlə məşğuldurlar. Mənəvi dəyərləri təbliğ etmək əvəzinə din tacirliyi edirlər, nağıl danışırlar. Cəmiyyətin əksəriyyətinə din xadimləri kəlimeyi şəhadəti aşılaya bilməyib. Camaat da Allahı, Quranı qoyub caduya inanır. Adətən sosial problemlər, məişət problemləri artanda, cəmiyyətdə narahat yaşam mövcud olanda dinə əqidəsi zəif olan adamlar cadugərlərə üz tuturlar. Təbii ki, bu da inama bağlıdır. Bir qism adam da dinə yox Allaha, Qurana yox, caduya inanırsa bu da öz işidir”.
Günel CƏLİLOVA
