Yadigar Məmmədli: “Söhbət etik qaydaların və insanların ləyaqətinin qorunmasından gedir”
Sayt və sosial şəbəkədə cəmiyyətə qarşı açıq hörmətsizlik hərəkətləri qadağan edilib. Prezident İlham Əliyev bununla bağlı "İnformasiya, informasiyalaşdırma və informasiyanın mühafizəsi haqqında" qanunda dəyişikliyi təsdiqləyib.
Belə ki, kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud bədənin hissələrinin insan əxlaq normalarına və milli-mənəvi dəyərlərə zidd formada göstərilməsinə dair məlumatların yayılması qadağan edilib.
Ümumən bunu ekspertlər necə dəyərləndirir?
Sözügedən məsələ ilə bağlı fikirlərini baki-xeber.com-la bölüşən media eksperti Yadigar Məmmədli hesab edir ki, bununla bağlı müvafiq qərarın qəbul olunması çox önəmlidir: “Ona görə ki, sosial şəbəkələr, onlayn portallar, saytlar artıq həyatımızın bir parçasına çevrilib. Hər kəs sosial şəbəkə üzərindən operativ məlumatları əldə edir. Eyni zamanda istənilən məlumatı o şəbəkələr vasitəsi ilə anında yaya bilirlər. Ən önəmlisi sosial şəbəkələrin auditoriyası böyükdür. Ancaq problem ondadır ki, bir sıra hallarda bu platformada etik qaydalar gözlənilmir. Bu, tək bizdə deyil, bütün dünyada belədir. Bəziləri sosial şəbəkənin imkanlarından sui-istifadə edir. İnsanların şərəf və ləyaqətini alçaldırlar. Etikadan kənar ifadələr işlədilir, insanlar linc edilir və s. Ona görə də bunun tənzimlənməsi ilə bağlı "İnformasiya, informasiyalaşdırma və informasiyanın mühafizəsi haqqında" qanunda dəyişikliyin təsdiqlənməsi doğru addımdır. Burada hansısa məhdudiyyətin yaradılmasından söhbət getmir. Söhbət etik qaydaların və insanların ləyaqətinin qorunmasından gedir. Prezidentin qərarı məhz buna xidmət edir. Belə bir tənzimlənməyə ehtiyac var idi. Məqsəd etik normaların, milli dəyərlərin qorunmasıdır. Ümid edirəm ki, bütün bunlar sosial şəbəkələrdə bir düzən formalaşdıracaq”.
Vidadi ORDAHALLI
