Hüseyn Axundov: “Tətbiqin ləng işləməsi sürücünün üzərinə məsuliyyət kimi yüklənə bilməz”
Son vaxtlar “Azparkinq” sistemi ilə bağlı sürücülərin narazılığı kəskin şəkildə artıb. Şikayətlərin əsas səbəbi parklanma mexanizminin rahatlıq yaratmaq əvəzinə, sürücülərin qayda pozmadığı halda əlavə cərimələnməsidir. Sürücülər qeyd edir ki, bu hal daha çox avtomobilin uzunmüddətli - 24 saatlıq parklanma müddəti başa çatdıqdan sonra müşahidə edilir.
Mövzu ilə bağlı fikir bildirən hüquqşunas Hüseyn Axundov “Bakı-Xəbər”ə bildirdi ki, sürücü parklanma haqqını ödəyibsə və bu ödəniş sistemdə əksini tapıbsa, sonradan göndərilən cərimə vətəndaşın hüquqlarının pozulması deməkdir: “Ümumiyyətlə, texniki gecikmələr və tətbiqin ləng işləməsi sürücünün üzərinə məsuliyyət kimi yüklənə bilməz. Məlumdur ki, parklanmanın əsas məqsədi şəhər nəqliyyatını tənzimləmək və xaosu azaltmaq olmalıdır. Lakin mövcud sistem sürücüləri məlumatlandırmaq və yönləndirmək əvəzinə, onları fakt qarşısında qoyur. Bəzən tətbiqdə real vaxtda xəbərdarlıq mexanizmləri düzgün işləmir, texniki quraşdırılmada problemlər olur. Buna baxmayaraq, sürücü cərimələnir. Ümumiyyətlə, 1 dəqiqə sistemə gec qoşulsa belə ona cərimə tətbiq edilir. “Azparkinq” xidmət mexanizmindən çox inzibati cərimə aləti təsiri bağışlayır. Sürücülər isə bu yanaşmanı ədalətsiz və qeyri-şəffaf hesab edirlər. Bu baxımdan tariflərin elastikləşdirilməsi, qısa və 24 saatlıq parklanma üçün alternativ sistem yaradılmalıdır”.
Həmsöhbətimiz onu da əlavə etdi ki, sürücülərin cərimələnməsinə səbəb avtomobili park etdikdən dərhal sonra mobil tətbiqi açmamasıdır: “Belə ki, sürücü nəqliyyat vasitəsini park etdikdən sonra mobil tətbiq açmalı və parklanmanın başladığını təsdiq etməlidir. SMS vasitəsilə ödəniş etmək istəyənlər isə parklanma başladıqda avtomobilin dövlət qeydiyyat nişanı və parklanma məntəqəsinin nömrəsini "1181" qısa nömrəsinə göndərməlidirlər. Sürücülər avtomobili park etdikləri məntəqə ilə mobil tətbiqdə seçdikləri məntəqə nömrəsinin eyniliyinə əmin olmalıdırlar. Mobil tətbiqdəki məntəqə sıralamasının onlara aid olduğu düzgün seçilməlidir”
Günel CƏLİLOVA
