Elman Cəfərli: “Su qıtlığını önləmək üçün görüləcək işlər sırasında ilk yeri səmərəli su idarəetməsi tutur”
Prezident İlham Əliyev Bakı və Abşeron yarımadasının su təminatının gücləndirilməsi məqsədilə ölkədə ilk dəfə olaraq duzsuzlaşdırma zavodunun inşa ediləcəyini və su sektorunda rəqəmsal idarəetmə sisteminin tətbiqinin vacibliyini bildirib.
Dövlət başçısının sözlərinə görə, layihə xarici investisiyalar hesabına həyata keçiriləcək və paytaxtın, eləcə də Abşeron yarımadasının içməli və suvarma suyu ilə təminatında əlavə, dayanıqlı mənbə yaradacaq.
“Yaşıl Dünya” Ekoloji Maarifləndirmə İctimai Birliyinin sədri Elman Cəfərli baki-xeber.com-a şərhində bildirdi ki, qlobal iqlim dəyişikliyinin, istiləşmənin ən çox üzə çıxardığı məsələ quraqlığın artması, su qıtlığının yaranmasıdır: “Qlobal istiləşmə nəticəsində buzlaqlar əriyir, meşələr seyrəlir, su mənbələri, yeraltı sular azalır. Yaxın gələcəkdə su stressi yaşayacaq ölkələr artıq hazırlıq tədbirlərinə başlayıblar. Hesablamalara görə, Azərbaycan da 2040-cı ildə su stressi yaşayacaq ölkələr sırasındadır. Su qıtlığını önləmək üçün görüləcək işlər sırasında ilk yeri səmərəli su idarəetməsi tutur. Son illər ölkəmizdə ağıllı su idarəetməsinə keçid istiqamətində əhəmiyyətli addımlar atılır. Su kanallarının yenilənməsi, yeni su anbarlarının inşası layihələri həyata keçirilir. Suya nə qədər qənaət etsək, o qədər bu problemi ağrısız həll edə bilərik. Qlobal iqlim dəyişikliyinin nəticələrinin yumşaldılması dövründə alternativ mənbələrin tapılması ilə bağlı tədbirlər sürətləndirilməlidir.
Alternativ mənbələrdən biri Azərbaycanda dəniz suyunun duzsuzlaşdırılmasıdır. Bununla əlaqədar layihə icra olunub. Bu məqsədlə 2013-cü ildə Salyan rayonunun Xıdırlı kəndində dəniz suyunu içməli su səviyyəsinə qədər təmizləməyə imkan verən, yüksək texnologiyaya əsaslanan zavod inşa edilib. Bakı və Abşeron yarımadasının su təminatının gücləndirilməsi məqsədilə ölkədə duzsuzlaşdırma zavodunun layihələndirilməsi yaxşı təşəbbüsdür. Ölkəmizin iqtisadi imkanları bu cür müəssisələrin tikilməsinə imkan verir. Amma yaxşı olardı ki, məişət sularının təkrar emalı zavodları da işə salınsın. Bakıda, Sumqayıtda, Xırdalan avroyuma müəsissələrinə içməli suyun verilməsi dayandırılmalıdır. Yaxşı olar ki, bu cür müəssisələrə, yaşıllaşdırma işlərinə təmizlənmiş məişət suları verilsin.
Dövlət, rəsmi qurumlar su qıtlığı ilə mübarizə tədbirlərini görür, səmərəli su idarəetməsinə keçid həyata keçirir. Amma cəmiyyət olaraq biz də bu tədbirlərə adekvat davranmalıyıq. Su qıtlığından yayınmaq üçün ən yaxşı üsul qənaətdir. Maarifləndirmə tədbirlərini gücləndirməli, insanlarımızı suya qənaətə öyrətməliyik. Bu işdə vətəndaş cəmiyyəti aktiv olmalıdır”.
Günel CƏLİLOVA
