Tural İrfan: “Dövlətin aidiyyəti strukturları anlatmalıdır ki, qanunsuz ibadət evi, məscid tikmək olmaz, müvafiq icazə alınmalıdır”
Bakının Qaradağ rayonunda qanunsuz məscid inşaası faktı aşkarlanıb. Hadisə Ələt qəsəbəsində baş verib. Sələfi dini təriqətinə mənsub bir qrup şəxsin adıçəkilən yaşayış məntəqəsində məscid tikintisi apardıqları məlum olub.
Qeyd edək ki, məscidin qanunsuz tikildiyi, bunun üçün heç bir razılıq alınmadığı məlum olub. Onu da bildirək ki, məscidin tikintisi dayandırılıb, fakt aktlaşdırılıb və müvafiq qurumlara göndərilib.
Ilahiyyatçı Tural İrfan baki-xeber.com-a bildirib ki, ibadət yerini dövlətdən icazə almadan tikmək haramdır: “Qaradağ rayonunda qanunsuz məscid tikilməsi haqda məlumatı mətbuatdan aldım. Nə dərəcə doğrudur, bilmirəm. İbadət yerini dövlətdən icazə almadan tikmək haram və batildir. Orada edilən ibadət də şeytana edilən ibadət kimidir. Əgər sözü gedən təriqətin üzvlərinə bu aydın deyilsə dövlətin aidiyyəti strukturları anlatmalıdır ki, qanunsuz ibadət evi, məscid tikmək olmaz, müvafiq icazə alınmalıdır”.
Məsələ ilə bağlı Dini Qurumlarla İş üzrə Dövlət Komitəsinə və Qaradağ rayon İcra Hakimiyyətinə sorğu ünvanladıq. Hər iki qurumun mövqeyin dərc etməyə hazırıq.
Günel CƏLİLOVA
