Cavanşir Əliyev: “Universitetlər öz məsuliyyətlərinə xüsusi diqqət yetirməlidir”
Azərbaycanda ali təhsili olduğu halda işsiz olan çox insan var. Dövlət Məşğulluq Agentliyinin hazırladığı “Məzunların məşğulluq reytinqi” əsasında ölkədə fəaliyyət göstərən 34 universitet üzrə işsiz məzunların sayı araşdırılıb.
Araşdırmaya görə, 2018-2022-ci illər ərzində 34 universitetdə 606 ixtisas üzrə təhsil alan 120 min 164 məzunun 56 min 405-i ilk 2 ildə heç bir iş tapa bilməyib. Bu isə o deməkdir ki, 5 ildə məzun olanların 46,9 faizi işsizdir.
Məlumat üçün bildirək ki, ölkə daxilində fəaliyyət göstərən ali təhsil mərkəzlərindən ən çox məzunu işsiz qalan Naxçıvan Müəllimlər İnstitutudur. Belə ki, bu institutda 5 il ərzində məzun olan 1159 nəfərin 63,9 faiz, yəni 741-i işsizdir. Siyahıda ikinci gələn dövlət ali təhsil mərkəzi isə paytaxtda yerləşən Bakı Slavyan Universitetidir. Üçüncü yerdə isə Mingəçevir Dövlət Universiteti dayanır. Bu təhsil ocağının məzunlarının 59,8 faizi işsizdir. Məzun sayına görə illlərdir ölkədə lider statusu daşıyan Bakı Dövlət Universitetində 5 il ərzində 19 min 24 nəfər məzun olub ki, onlardan da 10 min 767 nəfər 2 il ərzində iş tapa bilməyib. Bu da ümumi göstəricinin 56,6 % deməkdir. Siyahını daha da uzatmaq olar.
Onu da qeyd edək ki, əmək bazarında gənc kadrların əsas cəmləşmə nöqtələri pərakəndə ticarət, bank sektoru və xidmət sahələri olub. İşəgötürənlər üzrə məzun sayının "Top-10” siyahısı göstərir ki, ali və orta ixtisas təhsilini başa vuranların əhəmiyyətli hissəsi real sektorun geniş şəbəkəyə malik şirkətlərində iş tapır. Siyahıya "Araz" Supermarketlər şəbəkəsi başçılıq edir. Şirkət ümumilikdə 1071 məzunu işlə təmin etməklə həm regionlarda, həm də paytaxtda gənclər üçün əsas iş platformalarından birinə çevrilib.
Açıqlanan məlumatlardan bəlli olur ki, adıçəkilən universitetlərin məzunlarının əksəriyyəti işlə təmin olunmayıb. Bu məsələ ilə bağlı nə Elm və Təhsil Nazirlliyi nə də adıçəkilən universitetlər reaksiya verib.
Təhsil eksperti Cavanşir Əliyev baki-xeber.com-a bildirdi ki, Azərbaycanda vəziyyət olduqca narahatedicidir: “İşlə təmin olunma göstəricisi ölkənin iqtisadi və təhsil sektorunda ciddi islahatlara ehtiyac olduğunu göstərir. Təhsil sisteminin iş bazarına uyğunlaşdırılması, məzunların peşəkar bacarıqlarının artırılması və iş yerlərinin yaradılması bu problemin həllinə kömək edə bilər. İşsiz məzunların sayının artması həmin ali məktəblər üçün SOS siqnalı olmalıdır. Universitetlər öz məsuliyyətlərinə xüsusi diqqət yetirməlidir. Ali təhsilin keyfiyyəti artırılmalıdır. Universitetlər məzunlarının əksəriyyətinin işsiz qalması o deməkdir ki, həmin təhsil ocaqları əmək bazarının tələbinə uyğun kadr yetişdirə bilmir. Bu səbəbdən onlar öz məsuliyyətlərini dərk etməli və aidiyyatı qurumlar problemdəm çıxış yolunu axtarmalıdır”.
Günel CƏLİLOVA
