44 günlük haqq savaşımızda 30 il yağıya əsir olan Qarabağı qanları bahasına azad edib yeni, şanlı tariximizi yazan Altay və Elgün Mövlanov qardaşları ilə indi bütün Azərbaycan xalqı qürur duyur. Öz şərəfli ölümləri ilə Vətən səmasının əbədi parlaq günəşinə çevrilən qardaşlar zaman-zaman ürəklərdə yaşamaqla heç vaxt unudulmaz. Hər iki qardaşın ömür yolları qısa olsa da, illər keçəcək, gələn nəsillər də onlardan örnək götürəcək, Vətəni sevməyi, torpağı qorumağı onlardan öyrənəcək.
Leriklilər tarix yazan qəhrəman oğullarını heç vaxt unutmurlar. Şəhid Altayın 25 yaşı tamam oldu. Leriklilər bu müqəddəs günü sevgi və məhəbbətlə qeyd etdilər. Tədbir rayon Mədəniyyət Mərkəzində baş tutdu. Lerik rayon İcra Hakimiyyəti başçısının müavini Arzu Vəlimməmədovanın, YAP Lerik rayon təşkilatının sədr müavini Elnur Məmmədovun, şəhid ailələrinin, ictimaiyyət nümayəndələrinin qatıldığı tədbirdə əvvəlcə qürurumuza qürur qatan Azərbaycan Respublikasının Dövlət Himni oxundu, sonra isə Vətən uğrunda canından keçən, elə Vətən səmasının əbədi parlaq günəşinə çevrilən qəhrəman şəhidlərin xatirəsi bir dəqiqəlik sükutla anıldı.
Tədbiri giriş sözü ilə açan Heydər Əliyev Mərkəzinin direktoru Hüsaməddin Abbasov şəhid Altay və Elgün Mövlanov qardaşlarin keçdiyi şərəfli döyüş yolundan genış məlumat verdi. Xüsusi olaraq vurğuladı ki, hər iki qardaşın qısa ömrü fədakarlıq, mərdlik nümunəsinə döndü. Onlar qoynunda dünyaya göz açdığı Vətəni canından artıq sevirdilər, yurda ürəkdən bağlı idilər. Məhz bu keyfiyyətlər onları şəhidlik zirvəsinə ucaltdı. 44 günlük haqq savaşımızda sinəsini Vətənə sipər edib məkrlı düşmənə layiqli cavab verə bildilər. Özləri şəhid oldular, qaldı ki, doğma Azərbaycana olan borcunu ləyaqətlə, sədaqətlə yerinə yetirdilər. 30 il əsir Qarabağımızın mətin xilaskar ərənləri olan qardaşların adı əbədi yaddaşlarda yaşayacaq.
Tədbirdə şəhid valideynlərinin və ziyalıların qardaşlarla bağlı çıxışları Vətən sevgisinin, halal torpağa bağlılığın təcəssümü kimi səsləndi. Əksər çıxışların axırı belə bitirdi: “ Vətəndən, bizlərdən ötrü canlarını fəda edən qardaşlar hər zaman, hər bir ehtirama, sevgi və məhəbbətə layiqdirlər”. Şəhid qardaşlar üçün hazırlanmış video-çarxın nümayiş də ürəklərə ilahi bir sevgı gətirdi.
Daha sonra şəhər 2 saylı tam orta məktəbin şagirdlərinin və mərkəzin dərnək üzvlərinin ifasında şəhidlərin xatirəsinə həsr olunmuş ədəbi-bədii kompozisiya təqdim olundu.
Yekunda şəhid qardaşları - Altay və Elgünün anası bütün iştirakçılara, şəhid valideynlərinə tədbirdə onun yanında olduqları üçün ehtiramını bildirdi.
Zəfər ORUCOĞLU Azərbaycan Jurnalistlər Birliyinin üzvü
