Mətləb Salahov: “Universitetin çevik və dinamik fəaliyyəti üçün ona hüquqi imkanlar yaradılmalı, sərbəstlik verilməlidir”
Məlum olduğu kimi, “Qarabağ Universitetinin Nizamnaməsi”ndə dəyişiklik edilib. Bu barədə Baş nazir Əli Əsədov qərar imzalayıb.
Yeni qərarla rektor “Qarabağ Universitetinin Klinikası” publik hüquqi şəxsin rəhbərini təyin və ya vəzifədən azad edə bilməz, eləcə də həmin tibb müəssisəsində çalışan şəxslərlə bağlı həvəsləndirmə və ya intizam tənbehi tədbiri görə bilməz.
Məlumdur ki, Qarabağ Universiteti yeni yaradılıb. Ekspertlər hesab edir ki, universitetin rektorunun səlahiyyətlərini genişləndirmək lazımdır ki, o bölgədə nüfuzlu şəxsə çevrilsin. Rektorun nüfuzlu şəxsə çevrilməsi universitetin nüfuzu deməkdir. Rektorun səlahiyyətlərinin azaldılması universitetin mövqeyinə təsir edəcək. Mütəxəssislərin fikrincə, məlum səlahiyyətlər rektorda saxlanılsa, daha yaxşı olardı.
“Univeristetin rektoru bu təhsil müəssisəsi barədə bir sıra inzibati qərarlar vermək səlahiyyətində olmayacaqsa, təhsil olcağının dinamik inkişafı üçün tədbirlər görməyə ixtiyarı çatmayacaqsa...”
Jurnalist-ekspert Mətləb Salahov “Bakı-Xəbər”ə şərhində bildirdi ki, Qarabağ Universiteti təkcə bir təhsil ocağı kimi deyil, həm də doğma Qarabağımızın simvolu, elm-təhsil mərkəzi kimi böyük dəyərə sahibdir: “Doğma Xankəndimizdə fəaliyyət göstərən bu tarixi təhsil ocağının daha da inkişaf etməsi üçün dövlət tərəfindən də mühüm addımlar atılır. Bu, təbiidir. Çünki Azərbaycanın bu dilbər guşəsində yaradılan təhsil ocağı ilk növbədə böyük ərazini əhatə edən bu bölgənin gələcəkdə zəngin mütəxəssis və kadr potensialı ilə təmin olunması, elmi tərəqqisi və sosial inkişafı üçün də müstəsna imkanlara sahib olacaq. Əslində hər kəsə məlumdur ki, Prezident İlham Əliyevin 2023-cü il 28 noyabr tarixli Sərəncamı əsasında Qarabağ Universitetinin yaradılması hadisəsi ölkəmizin ərazi bütövlüyü və suverenliyinin tam bərpası ilə nəticələnən tarixi qələbələrin təntənəsi olmaqla, bütövlükdə Azərbaycanın təhsil sahəsindəki mühüm nailiyyəti hesab edilir. Regionun sosial-iqtisadi ehtiyaclarına uyğun yüksəkixtisaslı kadr tələbatının ödənilməsi və tarixən mövcud olmuş təhsil ənənələrinin yaşadılması məqsədilə həmin ali təhsil müəssisəsinin qurulması bölgənin bərpa və inkişafına töhfə vermək üçün təhsilin gücündən istifadəyə əsaslanan önəmli institusional addımlardan biri olaraq dəyərləndirilir.
Lakin burda bir məqam xüsusi rol oynayır. Bu da Universitetin çevik və dinamik fəaliyyəti üçün ona hüquqi imkanların yaradılması, sərbəstliyin verilməsidir. Mən düşünürəm ki, müasir təhsil sisteminə uyğun olaraq Qarabağ Universitetinin idarəçilik mexanizminin daha da sərbəstləşdirilməsi, Universitetdə yeni fakültələrin yaradılması, operativ qərarların verilməsi üçün təhsil qanunvericiliyi çərçivəsində Universitet rəhbərliyinin səlahiyyətləri geniş olmalıdır.
Univeristetin rektoru bu təhsil müəssisəsi barədə bir sıra inzibati qərarlar vermək səlahiyyətində olmayacaqsa, təhsil olcağının dinamik inkişafı üçün tədbirlər görməyə ixtiyarı çatmayacaqsa, o zaman Qarabağ Universitetində təhsilin və idarəçilik sisteminin işlək mexanizmə sahib olmasından danışmaq çətin olacaq. Dünyanın, eləcə də ölkəmizin bir sıra təhsil ocaqlarında publik-hüquqi şəxs statusunun sürətlə yayıldığı bir zamanda bu tarixi universitetdə bir sıra səlahiyyətlərin məhdudlaşdırılması ancaq və ancaq bu təhsil müəssisəsinin gələcək inkişafına mənfi təsir göstərəcək”.
Ekspert hesab edir ki, təcrübəli, peşəkar akademik və inzibati heyətin formalaşdırılmasına, müasir tələblərə cavab verən tədris və sosial infrastrukturların yaradılmasına şərait yaradılmalıdır. Həmçinin, yeni akademik məzmunda kadr hazırlığı proqramlarının qurulmasına, ölkə ərazisində universitetin genişmiqyaslı tanıdılmasının həyata keçirilməsinə və yüksəkkeyfiyyətli tələbə qəbulunun reallaşdırılmasına nail olmaq üçün təhsil ocağında mühüm qərarların verilməsi və icra olunması olduqca zəruridir.
Günel CƏLİLOVA
