44 günlük haqq savaşımız ulu tariximizin ən şərəfli səhifəsinə dönərək heç vaxt unudulmayacaq. Müzəffər Ali Baş Komandanımız İlham Əliyevin rəhbərliyi altında rəşadətli Ordumuzun qəhrəman əsgər və zabitləri 30 ilə yaxın erməni separatçılarının işğalında qalmış əzəli yurd yerimiz olan Qarabağımızı qanı bahasına azad edərək xalqımıza zəfər sevincini yaşatdılar. Bu tarixi zəfərdə qəhrəmanlıq, şücaət göstərərək şəhidlik zirvəsinə ucalan Vətənin qeyrətli övladı baş leytenant Asif Məmməd oğlu Kərimovun adı xalq tərəfindən qürurla çəkilir. Zaman keçəcək baş leytenantın Vətəninə bağlı ömür yolu gələn nəsillərə də örnək olacaq. Çünki qanı ilə torpağı Vətən edən igid, mərd oğullar heç vaxt ölmürlər. Şəhid Asif Kərimov kimi...
Vətənin azadlığı uğrunda polad sinəsini namərd gülləsinə sipər etməklə o, torpağa gömülmədi, yeni bir həyat yaşamaq üçün ünyetməz, əlçatmaz ulduzlu göylərə ucaldı. Bu hər kəsə nəsib olmur. Eləcə də baş leytenantın ölümündən sonra dövlət tərəfində layiq görüldüyü “Vətən uğrunda”, “Hərbi xidmətə görə”, Cəbrayılın, Qubadlının azadlığı uğrunda medalları müqəddəs şəhid adına daha bir şərəf qatıb.
Asif Kərimov 1989-cu ildə Cəlilabad rayonunun Ləzran kəndində dünyaya göz açıb. Həmin kənddə orta məktəbi bitirdikdən sonra Azərbaycan Dövlət Neft Akademiyasında təhsil alıb. Gün-güzəranı yaxşı olsa da, canından əziz tutduğu Vətən torpaqlarının yağı tərəfindən işğal olması onu rahat buraxmayıb və düşməndən qisas alacağı günü gözləyib. Odur ki, 2020-ci ilin 27 sentyabrda həmin məqam yetişəndə Asif könülü ön cəbhəyə yollanıb, ən qaynar nöqtələrdə düşmənlə ölüm-dirim savaşına girib. Ölümün gözünə dik baxmaqla həmişə öndə döyüşüb. Xeyli sayda ermənilərin hərbi texnika, silah-sursatını və canlı qüvvəsini məhv etməklə neçə-neçə döyüşün qəhrəmanı olub. Baş leytenant rütbəsində Füzulinin, Cəbrayılın və Qubadlının azadlığı uğrunda gedən ağır müharibə meydanlarında sözün əsl mənasında tarix yazıb. Vətən torpağının hər qarışı uğrunda canından keçməyə hazır olan baş leytenant Asif Kərimov 3 noyabr 2020-ci ildə Şuşanın azadlığı istiqamətində gedən haqq savaşımızda yağıya qarşı döyüşə-döyüşə şəhid olub. Doğulduğu Ləzran kəndində torpağa tapşırılıb.
Həyat yoldaşı deyir ki, Asif Vətəninə, xalqına çox bağlı idi. Biz onunla həm dost, həm də sirdaş idik. Onun yoxluğuna dözmək çox çətindir. O, müharibəyə yollananda dedi ki, ağlama, mən Vətən, torpaq üçün gedirəm. Övladlarımı sənə tapşırıram. Onun əmanət qoyduğu övladlarını - qızı Gülayını, oğlu Yusifi arzu etdiyi kimi böyüdürəm.
Zəfər ORUCOĞLU Azərbaycan Jurnalistlər Birliyinin üzvü
