Əzəldən Vətənə sevdalanan Rəfail İşiyev İkinci Qarabağ müharibəsində onun yolunda son damla qanına qədər mərdliklə döyüşüb şəhid olub. Beləcə, 1979-cu ildə Cəlilabad şəhərində müəllim ailəsində dünyaya göz açan xalqımızın igid, vətənpərvər oğlu 41 yaşında 30 il düşmənə əsir düşən müqəddəs yurd yerimiz Qarabağın xilaskarı kimi adını tarixə yazıb, qazanılan şanlı qələbəmizin qəhrəmanlıq simvoluna dönüb.
Bütün istək və arzuları xoş sabahlara köklənən Rəfail Əhmədağa oğlu 1996-ci ildə Cəlilabad şəhər 8 saylı məktəbi bitirib hərbi xidmətə yollanıb. Cəbhə bölgəsində əsgərliyə başlayan gənc ilk gündən Vətənin keşiyində vicdanla, qeyrətlə duracağına, murdar niyyətli erməni dığalarına qarşı amansız olacağına and içib.
Rəfailin doğma Azərbaycana göstərdiyi nümunəvi xidmət onu zabitlərin, əsgərlərin yanında başıuca edib. Qatıldığı təlimlərdə daim əla döyüşçü keyfiyyətləri ilə fərqlənib. Torpaqların müdafiəsində hərbi texnikanın rolunu yaxşı başa düşən Rəfail bu sahəyə daha çox meyl göstərib. PDM(BMP) mütəxəssisi olub. Hərbi işə səriştəsi, keçirdiyi uğurlu əməliyyatları, Vətən sevgisi onu tam bu sahəyə bağlayıb. Ömrünün 16 ilini orduda keçirən Cəlilabad elinin qeyrətli, mərd oğlu Azərbaycanın hər qarışına olan sevgisini odlu-alovlu döyüş meydanlarında sübut etməyi bacarıb. Belə ki, 2016-ci ilin Aprel döyüşlərində Vətən torpaqların azadlığı uğrunda ölümə meydan oxumaqla dığalara qan qusdurub, onların canlı qüvvəsinə, texnikasına böyük tələfat verməklə əsl qəhrəman kimi tanınıb.
Düşmən Lələ təpədən qovulanda hamıdan çox Rəfail sevinib, öz peşəsinə daha da ürəkdən bağlanıb. Bundan sonra onun peşəkarlığı nəzər alınaraq bir neçə dəfə möhtəşəm hərbi paradlara dəvət olunub, medallara layiq görülüb. Həmçinin xidmət zamanı xüsusi keyfiyyətlərinə, əməliyyatlarda göstərdiyi şücaətə görə 3-cü dərəcəli “Qüsursuz xidmətə görə”, ”Azərbaycan Silahlı Qüvvələrinin 90 illiyi”, “Azərbaycan Silahlı Qüvvələrinin 95 iliyi” və “Azərbaycan Silahlı Qüvvələrin 100 iliyi “ yubiley medalları ilə təltif edilib.
44 günlük haqq savaşımızda Rəfail Əhmədağa oğlu uzun qanlı-qadalı yollar keçib. İlk ciddi sınaqdan alnıaçıq çıxan qəhrəman Vətən sevdalısının hünəri hamını heyran qoyub, onunla çiyin-çiyinə vuruşan əsgərlərdə qələbəyə inam yaradıb. Daha sonra Rəfail Cəbrayıl rayonunun işğaldan azad edilməsi uğrunda gedən savaşda çoxlu sayda erməni dığasının, erməni tankının axırına çıxıb, onları lərzəyə salıb.
Qızğın döyüşlərin birində onun idarə etdiyi BMP vurulub. Ağır yaralansa da, 2 gün sonra yenidən döyüşlərə qatılıb. Yaralı döyüş yoldaşının BMP-sini idarə edərək Cəbrayıl, Füzuli istiqamətində gedən döyüşlərdə düşmənə ağır zərbələr vurub. Rəfailin texnikası ikinci dəfə vurulub və özü də yaralanıb. Buna baxmayaraq bir müddət sonra yenidən erməni qəniməti olan 3-cü BMP ilə döyüşlərə qatılıb, düşmənin kabusuna çevrilib. Son döyüşü isə Xocavənd istiqamətində olub. Təcrübəli mütəxəssis 3 noyabrda elə müharibə meydanında şəhadəti qovuşub.
Ölümündən sonra “Vətən uğrunda”, “İgidliyə görə”, Füzulinin, Cəbrayılın, Xocavəndin, Şuşanın azadlığı uğrunda medallara layiq görülən zəfər şəhidimizin həyat yoldaşı Sevda xanım deyir:- Mən qürur duyuram ki, Rəfail kimi bir qəhrəmanın yoldaşıyam. O mənim üçün sağdır. Vətən, torpaq yolunda canından keçdi, bütün xalq onun adını iftixarla çəkir. İki oğul yadigarı qalır. Evdə uşaqlara Vətən sevgisi aşılayırdı. Həmişə deyərdi ki, vətənpərvərliyi uşaqlara kiçik yaşlarda öyrətmək lazımdır. ..
Zəfər ORUCOĞLU Azərbaycan Jurnalistlər Birliyini üzvü
