Qadir Ədalət oğlu Heydərov 44 günlük haqq savaşımızda canı-qanı bahasına erməni dığalarına layiqli dərs verərək 22 yaşında şəhidlik zirvəsinə ucalıb.
Vətəninə, xalqına dərin məhəbbətlə bağlı olan bu igidin həyatı sönmədi, əlçatmaz, ünyetməz göylərin parlaq ulduzuna döndü. İndi xalqımızın qəhrəmanlıq salnaməsinə adın yazan Qadir bütün Azərbaycanın fəxridir. Həmçinin milyonlarla insanın qəlbində öz əbədi heykəlini ucaldan bu unudulmaz insan “Vətən uğrunda”, Cəbrayılın və Qubadlının azadlığına görə medallarla təltif olunub. Bu da Qabilin yaşadığı yurda ilahi sevgidən gələcək nəslə bir yadigardır.
Qadir Heydərov 11 may 1998-ci ildə Cəlilabad rayonu, Əsədli kəndində doğulub. Sonra Bakıya köçən qəhrəmanımız şəhərdəki 59 saylı məktəbdə 5-ci sinfə qədər oxuyub. Orta təhsilini Abşeron rayonu, Mehdiabad 1 saylı məktəbdə başa vurub. Qadirin nizam-intizamı, əxlaqı, vətənpərvərliyi, yaxşılardan görüb-götürmək bacarığı oxuduğu təhsil ocağında hamını heyran qoyub.
Vətən torpağının hər qarışını əziz bilən Qadir Qarabağımızı işğal etmiş erməni dığaların od qoymaq məqsədilə 2016-cı ildə ordu sıralarına yollanıb. Vicdanlı, qeyrətli, ürəyi doğma Azərbaycana sevdalanan əsgərin nümunəvi xidməti qısa zaman kəsiyində hərbi hissədə ona hörmət gətirib. Cəbhə bölgəsində Vətəninə keşik çəkmək nə qədər çətin olsa da, Qadir bundan qürur duyub. Həm də yaxşı dərk edib ki, döyüş meydanında düşmənə qaliq gəlmək üçün hərbi təlimlərdə fəal olmaq əsas şərtdir. Odur ki, Qadir keçirilən təlimlərə ürəklə, cəsarətlə qoşulub, uğur qazanmaqla ad qoyub. 2018-ci ildə əsgərlik həyatı başa çatanda komandirləri əla döyüşçü keyfiyyətlərə malik bir Vətən oğlu kimi ondan ayrılırlar.
İkinci Qarabağ savaşında Qadir Heydərov Vətənin çağırışına birinci səs verib. Qeyrətli oğullara qoşulub ön cəbhəyə, odun-alovun içinə gedib. Əlinə silah alan andan 30 il əsir düşən Qarabağımızın son qarışının azad olunacağı günədək düşmənlə döyüşəcəyinə and içib. İlk qəhrəmanlığını Qubadlıda göstərib. Çətin döyüş əməliyyatında yağının həm canlı qüvvəsinə, həm də texnikasına böyük itki verib. Daha sonra Zəngilan, Cəbrayıl istiqamətlərində gedən qızğın müharibə meydanlarında mərdliklə döyüşüb, dığalar onun qarşısında tab gətirə bilməyib. Neçə-neçə haqq savaşımızın qəhrəmanı olan Qadir Ədalət oğlu 29 oktyabr 2020-ci ildə Qubadlının adsız yüksəkliyində snayperlə başından vurulub, Vətən sevgisi ilə çırpınan ürəyi həmişəlik dayanıb. 22 yaşlı zəfər şəhidimiz Abşeron rayonundakı Mehdiabad qəsəbəsində canından əziz tutduğu torpağa tapşırılıb.
Zəfər ORUCOĞLU Azərbaycan Jurnalistlər Birliyinin üzvü
