Cəlilabadda doğuldu, Füzulidə şəhadətə qovuşdu – şəhid Elvin Bayramov...
44 günlük haqq savaşımızda Cəlilabad rayonunun Adnalı kəndində dünyaya göz açan Elvin Bayramov Vətənini öz canından əziz tutaraq 22 yaşında şəhid oldu. Bu hünər, rəşadət Elvini nəinki doğmaları üçün, bütün Azərbaycana əziz etdi. Elvinin adı indi kiçikdən tutmuş böyüyə kimi hamının dilində böyük məhəbbətlə, qürurla səslənir. Həm də ölümsüzlüyə qovuşan qəhrəmanımız gələcək Vətəninə, xalqına, dövlətinə sadiq gənc nəslə örnək, müqəddəs, şərəfli həyat yolu yaşadı. Onun ölümündən sonra layiq görüldüyü “Vətən uğrunda”, Füzulinin, Xocavəndin azadlığına görə medalları da müharibə meydanında göstərdiyi şücaətə bir nümunə oldu.
Yaşadığı cəmiyyətdə igidliyi, mərdliyi, dürüstlüyü, saf əqidəsi ilə tanınan, sevilən Elvin Bayramov yurduna, el-obasına daha çox gərəkli olmaq məqsədilə Lənkəran Dövlət Universitetinə daxil olub. Mükəmməl biliyə malik olmaq üçün oxuyub öyrənməkdən doymayıb, mənəvi aləmi, həyat sevgisi, görüb-götürmək bacarığı, ünsiyyət mədəniyyəti ona hörmət gətirib.
Elvin Bayramov ali məktəbi yüksək səviyyədə başa vurub. Bütün arzuların zirvəsində Vətənin, xalqın xoşbəxtliyi dayanan gənc oğlan yağı tərəfindən işğal olunmuş Qarabağın azadlığını çox istəyirdi. Bu yolda özünü şəhid verməyə belə hər an hazır idi. 2020-ci ildə hərbi xidmətə çağırılanda sevinib. Cəbhə bölgəsində əlinə silah alıb Vətənin keşiyində duranda ürəyi düşmən işğalında qalan doğma yurd yerləri azad edib qələbə ilə evə dönmək məqsədilə döyünüb. Doğma Azərbaycanın hər qarışını özünə əziz bilən Elvin ona vicdanla, qeyrətlə xidmət edib, həm də yağıdan qisas alacağı günü gözləyib. Nəhayət, 2020-ci ilin 27 sentyabrında həmin məqam yetişib. İgid əsgər ilk gündən düşmənlə ölüm-dirim savaşına atılıb, neçə-neçə döyüşdən zəfərlə çıxıb. Hər dəfə silaha sarılıb odun-alovun içinə girəndə onlarla erməni əsgərinin axırına çıxıb. Füzulinin azad olunması uğrunda gedən haqq savaşımızda mərdliklə döyüşüb. 2020-ci il oktyabrın 29-da Füzuli rayonu Seyidəhmədli kəndində gedən ağır müharibədə son damla qanını tökərək cavan ömrünə nöqtə qoyulub...
Cəlilabadın qəhrəman oğlu Elvin Bayramov Vətəni canından əziz tutub şəhidlik zirvəsinə ucalıb. Şəhidlər heç vaxt ölmürlər. Onların ünyetməz ulduzlu bir dünyası olur. Saçdıqları işıq onları daimi ürəklərdə yaşadır. Odur ki, hər dəfə şəhid Elvinin adı çəkiləndə bütün Azərbaycan xalqı iftixar hissi keçirdir.
Zəfər ORUCOĞLU
Azərbaycan Jurnalistlər Birliyinin üzvü
