Akif Nəsirli: “Hazırda yay mövsumidir, ölkədə kifayət qədər qarpız-yemiş istehsal olunur”
Azərbaycan Çindən qarpız alışını 300 dəfə, yemiş alışını 198 dəfə artırıb. Danılmaz faktdır ki, Azərbaycanın özünün keyfiyyətli qarpız, yemiş sortları mövcuddur. Azərbaycanda kifayət qədər bostan və tərəvəz bitkilərinin əkiləcəyi torpaqlar var.
Yemiş və qarpızla bağlı xüsusilə Mərkəzi Aran rayonlarında münbit şərait var. Hər il bostan mövsümü ərzində yetişdirdiyi yemişi, qarpızı sata bilməyən fermerlərin şikayətlərini eşidirik.
Onu da qeyd edək ki, qarpız-yemiş ölkəmizə Çinlə yanaşı, Türkiyə, Braziliya, Kosta-Rikadan da idxal olunur.
Bəs özümüzdə bolluqdursa, yetişdirə biliriksə, qarız-yemişi niyə xaricdən idxal edirik?
“İndi Çinlə iqtisadi əlaqələrimiz güclənib, bunun nəticəsində yanvar, fevral, mart aylarında ölkəyə Çindən adıçəkilən məhsulların idxalı artıb”
Liberal İqtisadçılar Birliyinin sədri Akif Nəsirli “Bakı-Xəbər”ə açıqlamasında qeyd etdi ki, Azərbaycana Çindən qarpız-yemiş idxalı ilə bağlı açıqlanan statistikada anlaşılmazlıq var: “Əvvəllər Azərbaycana Çindən az miqdarda yemiş-qarpız yalnız qış aylarında idxal olunurdu. Həmin ərəfədə idxal olunan qarpız-yemiş heç bir ton belə olmurdu. Məlumdur ki, indi Çinlə əlaqələrimiz güclənib, bunun nəticəsində yanvar, fevral, mart aylarında ölkəyə Çindən adıçəkilən məhsulların idxalı artıb. 6 aylıq statistik məlumatlarda qeyd edilir ki, Azərbaycan Çindən qarpız alışını 300 dəfə, yemiş alışını 198 dəfə artırıb”.
Həmsöhbətimiz onu da əlavə etdi ki, hazırda yay mövsumidir və ölkədə kifayət qədər qarpız-yemiş istehsal olunur: “Hətta şəhərin bəzi marketlərində qarpızın kiloqramı 25-30 qəpiyə təklif olunur. Məlumat üçün, hazırda Çindən ölkəmizə qarpız-yemiş idxal olunmur, çünki yerli istehsal daxili tələbatı ödəyir. Yay aylarında Azərbaycanda kifayət qədər qarpız becərilir. Bununla da Azərbaycanın daxili tələbatı ödənilir. Hələ ixrac da edilir. Çindən idxal qış ayları üçündür. Statistika 6 aylıq elan olunur. 7-ci ayda qışda Çindən Azərbaycana idxal olunan qarpız barədə məlumat verilir. Ona görə də hanı bizim yerli qarpızlar deyə təəccüblənirik".
Ekspertin sözlərinə görə, yanvar-may aylarında yemişə olan tələbatın ödənilməsi üçün idxala üstünlük verilir. Qeyri-mövsüm vaxtı həmin məhsullar digər ölkələrdən gətirilə bilər: “Bu, bütün ölkələrdə baş verən prosesdir. Çünki yanvar-mart aylarında ölkəmizdə yemiş yetişdirilməsi mümkün deyil. Bu bitkinin istiliyə ehtiyacı var. Çinin də cənub hissəsində bəzi bölgələri var ki, isti ərazilərdir və orada məhsul tez yetişir. O səbəbdən də oradan ixrac olunur. Ancaq hazırda ölkədə yemiş yetişir və bazarda da öz məhsulumuz satılır”.
Günel CƏLİLOVA
