“Bağçalarda mütəmadi yoxlamalar aparılır. Bu ilin altı ayı ərzində 40 bağça direktoru vəzifəsindən azad edilib, 100-dən artıq şəxs barəsində inzibati tədbir görülüb". Bunu elm və təhsil naziri Emin Əmrullayev "Sertifikatlaşdırma 2025: peşəkar müəllim - keyfiyyətli təhsil" mövzusunda keçirilən tədbirdə çıxışı zamanı deyib.
Qeyd edək ki, bu ilin ilk yarısında 40 bağça direktorunun vəzifədən azad edilməsi və 100-dən çox şəxsin inzibati məsuliyyətə cəlb olunması məktəbəqədər təhsil müəssisələrində ciddi struktur və idarəetmə böhranının mövcud olduğunu təsdiqləyir.
Onu da bildirək ki, orta məktəblərdə də analoji hal yaşanır. Hansısa məktəb direktoru işini düzgün icra etmirsə vəzifəsindən azad edilir. Məktəb direktorları işdən çıxarılarkən onların hansı səbəbdən vəzifəsindən azad edildiyi ictimaiyyətə açıqlanır. Ancaq bağçalarla bağlı məsələ qaranlıqdır. Maraqlıdır, bağça direktorları hansı səbəbdən işdən azad edilir?
Cahid İmanlı: “Bağça müdirlərinin işdən çıxarılma səbəblərindən biri uşaqların qidalanma prosesinun düzgün aparılmaması, uşaqların qida və ərzaqla təminatı ilə bağlıdır”
Təhsil eksperti Cahid İmanlı “Bakı-Xəbər”ə şərhində bildirdi ki, bu gün təhsilin ən çox qayğıya ehtiyacı olan, ən çox maliyyə ayrılan, ən çox diqqət edilməsi lazım və ilk pilləsi olan məktəbəqədər təhsil ocaqları daha çox bağça müdirlərinin "yeyinti yerinə" çevrilib. Bunu Elm və Təhsil Nazirliyinin yoxlamaları bir daha təsfiq etdi. Onlarla bağça müdiri işdən çıxarıldı, daha çoxuna isə töhmət, şiddətli töhmət verildi: “Bağça müdirlərinin işdən çıxarılma səbəblərindən ən əsası uşaqların qidalanma prosesinun düzgün aparılmaması, mətbəxin saxlanma şəraitinin yarıtmaz olması, bir sözlə, uşaqların qida və ərzaqla təminatı ilə bağlıdır. Görünür, bağça direktorlarının əsas qazancları məhz bu yöndə olub. Digər səbəblərdən biri direktorların rəsmi portal qeydiyyatından kənar uşaqları bağçaya cəlb etməsi, digər halda isə davamiyyətin aşağı olması və ya olmaması hallarıdır. Maraqlıdır ki, bağça müdirlərinin işdən çıxarılmasına gətirib çıxaran ən əsas faktor məhz valideynlərin kütləvi şikayətlərindən sonra Nazirlik tərəfindən aparılan yoxlamalar nəticəsində baş verir. Valideynlərsə daha çox hər uşağa görə müdiriyyət tərəfindən onlardan tələb olunan aylıq puldan, pulun verilməsinə baxmayaraq uşaqların ərzaqla təminatının və pedaqoji-təlim prosesinin düzgün və normal təşkil edilməməsindən şikayətçi olurlar”.
Elmin Nuri: “Bağçalarda qida standartı, müəyyən normativlər var, bu qaydalara əməl etməyənlərin işinə xitam verilir”
Təhsil eksperti Elmin Nuri “Bakı-Xəbər”ə açıqlamasında vurğuladı ki, məktəbəqədər təhsil müəssisələrində aparılan monitorinqlər bir çox fəsadların qarşısını aldı. Uşaq bağçaları uzun müddət Elm və Təhsil Nazirliyinin bazasında olmayıb: “Bir neçə il öncə bu dəyişiklik edildi və məktəbəqədər təhsil müəssisələri adıçəkilən nazirliyin tabeliyinə verildi. Bu müddət ərzində Elm və Təhsil Nazirliyi bağçalarla bağlı çox ciddi işlər görməyə başlayıb. İl ərzində bağçalarda çalışan minlərlə tərbiyəci və ya müəllim işdən azad edilib. Səbəb kimisə onların ya aidiyyəti təhsilinin olmaması, ya da öz işindən kənar fəaliyyətlə məşğul olması göstərilib. Təxminən 5000 şəxs bağçadan uzaqlaşdırılıb. Bağçalarda aparılan monitorinqlər bir çox fəsadları üzə çıxarıb. Həmin fəsadların yaranmasının səbəbkarı isə bağça rəhbərliyidir. Bağça rəhbərlərinin bir qisminə şiddətli töhmət verildi, böyük əksəriyyəti işdən uzaqlaşdırıldı. Bu il isə 40 bağça direktoru işdən azad edilib. Bağça direktorlarının işinə xitam verilməsinə səbəb onların öz işlərində yol verdiyi xətalardır. Vəzifə öhdəliyini düzgün icra edə bilməyənlər işdən azad edilib. Məlumdur ki, bağçalarda qida standartı, müəyyən normativlər var. Bu standartlara, qaydalara əməl etməyənlərin işinə xitam verilib”.
Günel CƏLİLOVA
