Təhsil Nazirliyi “qanunsuz” azad edir, məhkəmələr bərpa edir...
Elşən Qafarov: “Nazir özü də etiraf edir ki, məktəb direktorları ilə bağlı verilən hər beş qərardan biri qanunsuzdur”
Elm və təhsil naziri Emin Əmrullayev ADA Universitetində “Sertifikatlaşdırma 2025: peşəkar müəllim - keyfiyyətli təhsil” mövzusunda keçirilən tədbirdə deyib ki, bu il işdən çıxarılan məktəb direktorlarının 20 faizi məhkəmə qərarı ilə işinə bərpa olunub.
Nazir həmçinin bildirib ki, məktəblərdə qeydə alınan neqativ hallar araşdırılır və qanunvericiliyə uyğun tədbirlər görülür.
İşdən çıxarılmış məktəb direktorlarını məhkəmə vəzifəsinə bərpa edirsə, deməli direktor qanunsuz çıxarılıb. Belə çiy qərarların məsuliyyətini kim daşımalıdır?
“Təhsilin idarə olunmasında səriştəsizlik o qədər baş alıb gedir ki...”
Tanınmış təhsil eksperti Elşən Qafarov “Bakı-Xəbər”ə bildirdi ki, məhkəmə işdən qanunsuz çıxarılan məktəb direktorlarının əmək hüququnu bərpa edib: “Nazir özü də etiraf edir ki, məktəb direktorları ilə bağlı verilən hər beş qərardan biri qanunsuzdur. Çünki məhkəmə işçilərin əmək hüquqlarını bərpa edir. Ona görə də, elm və təhsil naziri daha hiyləgər bir metoda əl atır. Bütün vəzifəlilər - məktəb direktorları, direktor müavinləri və digərləri ilə 1 il müddətinə əmək müqaviləsi bağlanılır. Kimi işdən çıxarmaq istəsələr o 1 ilin tamamında onunla əmək müqaviləsini uzatmırlar.
Təhsilin idarə olunmasında səriştəsizlik o qədər baş alıb gedir ki, insanlar qanunsuz olaraq işdən çıxarılır”.
E.Qafarovun sözlərinə görə, nəticə etibarı ilə bu təkcə məktəb direktorlarının vəzifədən çıxarılması ilə bağlı deyil, təhsil sitemində kütləvi baş verən haldır. “Düşünürəm ki, bu ölkənin təhsil sistemində işdən çıxarılası bir adam varsa o da Emin Əmirullayevdir. Emin Əmirullayev və onun qeyri-peşəkar, təhsillə bağlı olmayan komandasının Azərbaycan təhsilinə vurduğu ağır zərbələr təkcə qanunsuz addımlarla bitmir. Mənası olmayan, amma büdcə dəyəri çox böyük olan layihələr “n” qədərdir, hansını desəniz səmərəsizdir. Daha sonra çox böyük maliyyə ayrılan və heç bir səmərəsi, nəticəsi olmayan mənasız təlimlər keçirilir. Üçüncüsü isə imtahanlardır. Məktəb direktorlarını, digər şəxsləri işdən çıxardıqca hamısında da imtahan keçirirlər. Ümumikdə Təhsil Nazirliyinin fəaliyyətinə nəzər salsaq görəcəyik ki, son beş ildə nazirliyin qurduğu bütün fəaliyyət imtahanlardan, təlimlərdən, layihələrin həyata keçirilməsindən ibarətdir. Ölkənin təhsil siyasəti bir yana qalıb. Nəticə etibarı təhsil sistemi elə bir labirintə salınıb, elə bir xaos içindədir ki... Emin Əmirullayevin Azərbaycan təhsilinə vurduğu ziyanın nəticələrinin aradan qaldırılması üçün bir neçə onilliklər lazım olacaq. Bu baxımdan, Emin Əmurullayevin nə deməsindən aslı olmayaraq bu gün ölkə təhsilində bütün problemlərin müəllifi və bu problemlərin get-gedə böyüməsində əsas funksional işi görən məhz nazir özüdür. Ona görə də onun danışıqlarına qeyri-ciddi baxıram”.
E.Qafarov qeyd etdi ki, bütün bu problemlər nazirin fəaliyyəti ilə bağlıdır və o, Azərbaycan tarixində təhsilimizə rəhbərlik edən ən uğursuz nazirdir.
Leyla QARAXANLI
