Vüqar Bayramov: “Pul köçürmələri həm sahibkar, həm də vətəndaşlar tərəfindən həyata keçirilir”
Bu ilin birinci rübündə Azərbaycandan Almaniyaya fiziki şəxslərin pul köçürmələrinin həcmi 4,891 milyon ABŞ dolları təşkil edib.
Mərkəzi Bankın yaydığı məlumata əsasən, bu göstərici 2024-cü ilin eyni dövrü ilə müqayisədə 174 min ABŞ dolları və ya 3,7% çoxdur. 2024-cü ilin birinci rübündə Azərbaycandan Almaniyaya fiziki şəxslərin pul köçürmələrinin həcmi 4,717 milyon ABŞ dolları təşkil edib.
Bu dövrdə Almaniyadan Azərbaycana 4,657 milyon ABŞ dolları həcmində pul köçürülüb ki, bu da, illik müqayisədə 738 min ABŞ dolları, yaxud da 13,7% azalma deməkdir. Qeyd edək ki, ötən ilin ilk üç ayında bu məbləğ 5,395 min ABŞ dolları idi.
“Azərbaycandan Almaniyaya pul köçürmələrinin artmasının səbəbi həmin ölkədə yaşayan vətəndaşlarımızla bağlıdır”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, pul köçürmələri həm sahibkar, həm də vətəndaşlar tərəfindən həyata keçirilir: “Nəzərə almaq lazımdır ki, avronun məzənnəsi yüksəldiyi üçün Almaniyadan Azərbaycana idxal edilən məhsulların dəyərində artım müşahidə olunur. Bu da Almaniyadan Azərbaycana idxal olunan məhsullara təsir göstərir, idxalın həcmində özünü büruzə verir”.
Həmsöhbətimiz onu da əlavə etdi ki, Azərbaycandan Almaniyaya pul köçürmələrinin artmasının səbəbi həmin ölkədə yaşayan vətəndaşlarımızla bağlıdır: “Məlumdur ki, Almaniyaya azərbaycanlılar təhsil və digər məqsədlər üçün üz tutur. Həmçinin, Almaniyada yaşayan azərbaycanlılar da az deyil. Ümumiyyətlə, son ullər Almaniyada yaşayan Azərbaycan vətəndaşlarının sayı artır. Dediyim kimi, bura təhsil və iş üçün gedənlər daha çoxluq təşkil edir. Orda işləyib-yaşayanlar da Azərbaycana, öz doğmalarına pul göndərir. İki ölkə arasında olan iqtisadi münasibət pul köçürmələrinin həcminə təsir edir”.
Millət vəkilinin sözlərinə görə, hazırda idxal-ixrac əməliyyatlarında köçürmələrə çox ciddi nəzarət var. Bu nəzarət sayəsində il ərzində ölkəmizə daha çox pul köçürülməsinə nail olunacaq.
Günel CƏLİLOVA
