Əkrəm Abdullayev doğma Azərbaycana, öz millətinə ürəkdən bağlanmışdı. 44 günlük haqq savaşımızda Vətən, torpaq uğrunda canından keçməklə daxilindən gələn ilahi sevgisini sübut etdi. Yağıya qarşı son nəfəsə qədər qəhrəmanlıqla döyüşərək ömrünün 22-ci ilində əbədi olaraq yaddaşlara köçdü.
30 il düşmənə əsir düşən müqəddəs yurd yerimiz olan Qarabağımızın azadlığı naminə tarix yazıb şəhidlik zirvəsinə ucalan Əkram Azad oğlu Cəlilabad rayonunun Qarakazımlı kəndində doğulub boya-başa çatıb. O, özünü bilən gündən həyatın mənasını xalqına layiqlı xidmətdə, yurduna halal sevgidə görüb. Həm də erməni dığaların Qarabağımızın işğalı Əkrəmı çox düşündürüb. Elə Vətən sevdalısı 2017-ci ildə yağıdan qisas almaq üçün ordu sıralarına gedib.
Əkrəm Abdullayev cəbhə bölgəsində Vətən, torpaq keşiyində ayıq-sayıq dayanıb. Nümunəvi xidməti, mərdliyi, doğma Azərbaycana sədaqəti hərbi hissədən ona hörmət qazandırıb. Qatıldığı təlimlərdə həmişə cəsarətlə, ağılla hərəkət edib, döyüş meydanında düşməndən qisas almaq məqsədilə hərbin sirlərinə böyük həvəslə yiyələnib. Həmişə də deyib ki, nəyin bahasına olursa-olsun Qarabağımızı tezliklə mənfur düşməndən azad etməliyik. Yoxsa, gələcək heç vaxt bizi bağışlamaz. Məqam gəlsə, mən bu müqəddəs yolda canımdan belə keçməyə hazıram.
Vətən torpağı düşmən tapdağında qalan Əkrəm əsgərlikdən sonra heç cür evdə, dalda-bucaqda gün keçirməyi vicdanına sığışdıra bilməyib. 2019-cu ildə yenidən orduya qayıdıb və Beyləqan rayonunda yerləşən "N" saylı hərbi hissədə MAHHXHQ əsgər kimi Azərbaycanın keşiyində durub. Vətən Müharibəsi başlayanda birincilər sırasında səngərdə yerini alıb, düşmənə qarşı sonsuz nifrətlə döyüşüb. Qəlbində Vətənə məhəbbəti aşıb-daşan Əkrəmin yağıya vurduğu zərbələr gündən-günə artıb. Erməni dığaların kabusuna çevirməklə neçə-neçə ağır sınaqlarda zəfər qazanıb. Çoxlu düşmən yaraqlısını məhv etməklə çiyin-çiyin vuruşduğu yoldaşlarda qələbəyə inam yaradıb. İgid döyüşçü Cəbrayılın, Füzulinin, Qubadlının azad edilməsi uğrunda gedən ölüm-dirim savaşlarda əsl rəşadət nümunəsini göstərib. 29 oktyabr 2020-ci ildə Laçında Vətənə tuşlamış düşmən gülləsini öz sinəsi ilə alan yerdə şəhadətə qovuşub. Şərəfli ölümü ilə xalqın qəlbində özünə əzəmətli abidə ucaldan Cəlilabadın Vətən qeyrətli oğlu Əkrəm Abdullayev ölümündən sonra "Vətən uğrunda", Füzulinin və Qubadlının azadlığına görə medalları ilə təltif edilib.
Bəli, Əkrəm qısa bir ömür yaşadı. Nəsibi şəhidlik zirvəsindən boylanmaq səadəti olduğuna görə o, xalqı üçün qəhrəmanlıq simvoluna döndü.
Zəfər ORUCOĞLU Azərbaycan Jurnalistlər Birliyinin üzvü
