Erməni təcavüzünə ilk cavab verənlər polislər oldu...
İyulun 2-si Azərbaycanda Polis günüdür. Azərbaycan dövlətinin formalaşmasında, milli maraqların qorunmasında mühüm rol oynayan, müstəqilliyimizin müdafiəsində ön sıralarında dayanan, təhlükəsizliyimiz və əmin-amanlığımızın keşiyində duran Azərbaycan polisi 107 yaşını qeyd edir.
Azərbaycan polisinin yaranma tarixi Azərbaycan Xalq Cümhuriyyətinin adı ilə bağlıdır.
1920-ci il aprelin 27-də cümhuriyyətin süqutundan sonra da sovet ittifaqının tərkibində olan Azərbaycan polisi bu dövrdə də cinayətkarlığa qarşı qətiyyətli mübarizə aparıb, asayişin qorunmasında xüsusi fəallıq göstərib. Ulu Öndər Heydər Əliyevin birinci dəfə ölkəmizə rəhbərlik etdiyi dövrdə - 1970-1980-ci illərdə Daxili İşlər Nazirliyi və ona bağlı orqanlar yüksək peşəkarlığı ilə fərqlənib.
1988-ci ildə Ermənistanın Azərbaycana qarşı hərbi təcavüzünə qarşı ilk cavab verən Azərbaycanın milis qüvvələri və Daxili Qoşun hissələri olub. İşğalçılarla döyüşlərdə 1700-ə yaxın polis əməkdaşı və hərbi qulluqçu şəhidlik zirvəsinə ucaldı, 1710 nəfər isə yaralandı. Göstərdikləri igidliyə görə 67 nəfər Azərbaycanın Milli Qəhrəmanı adına, 1143 nəfər orden və medallara layiq görülüb.
Ulu Öndərin 1998-ci ildə imzaladığı Fərmana əsasən 2 iyul Azərbaycanda Polis günü kimi qeyd edilir.
Prezident cənab İlham Əliyevin hakimiyyəti dövründə Daxili İşlər Nazirliyinin bütün strukturlarının fəaliyyəti gücləndirildi, peşəkarlıq səviyyəsi artırıldı. Daxili Qoşunların peşəkar kadr özəyi formalaşdırıldı.
Vətən müharibəsində Daxili İşlər Nazirliyi strukturlarının oynadığı rol unudulmazdır. Bu müharibədə Daxili Qoşunların şəxsi heyətindən 66 nəfər şəhid olub, 346 hərbi qulluqçu isə yaralanıb. Doğma yurdumuzun işğaldan azad olunması uğrunda qəhrəmancasına döyüşmüş Daxili Qoşunların əməkdaşlarından 1690 nəfər Prezident cənab İlham Əliyevin imzaladığı sərəncamlarla müxtəlif orden və medallara, o cümlədən 4 nəfər Vətən Müharibəsi Qəhrəmanı adına layiq görülüb. İstər Birinci Qarabağ döyüşlərində, istərsə də 44 günlük Vətən müharibəsində Daxili Qoşunların hərbi qulluqçuları və polis əməkdaşları işğalçılara qarşı mətinliklə vuruşublar. 2023-cü il sentyabrın 19-da Xankəndi şəhəri ətrafında öz vəzifə borcunu yerinə yetirərkən polislərimizin ermənilərin basdırdıqları minaya düşərək həlak olması dövlətimizin səbr kasasını tükəndirdi. Həmin gün Ali Baş Komandan İlham Əliyevin rəhbərliyi ilə Silahlı Qüvvələrimiz yüksək peşəkarlıq göstərərək işğal altındakı bütün əraziləri erməni separatçılarından təmizlədi. Antiterror əməliyyatı zamanı DİN-in 20 əməkdaşı şəhidlik zirvəsinə yüksəlib.
Vətən müharibəsindən sonra işğaldan azad olunmuş ərazilərdə yaradılan müvəqqəti komendantlıqların fəaliyyətinin təşkilinin DİN-ə həvalə edildi.
İRADƏ
