Naxçıvanda Hemodializ Mərkəzi fəaliyyətə başlayır...
Naxçıvanda Hemodializ Mərkəzinin önümüzdəki ayın sonunda fəaliyyətə başlaması nəzərdə tutulur. Bu barədə KİV-ə Naxçıvan Muxtar Respublikasının Səhiyyə Nazirliyindən məlumat verilib.
Bildirilib ki, Muxtar Respublikanın səhiyyə sistemində hemodializ xidmətlərinin genişləndirilməsi istiqamətində mühüm addımlar atılır.
İcra edilən əsas layihələrdən biri də xroniki böyrək çatışmazlığından əziyyət çəkən pasiyentlərə göstərilən ixtisaslaşdırılmış tibbi xidmətin keyfiyyətinin yüksəldilməsinə yönəlmiş “Hemodializ Mərkəzi”nin yaradılması və müasir tələblərə cavab verən avadanlıqlarla təmin olunmasıdır.
Mərkəzin yaradılmasında əsas məqsəd muxtar respublikada dializdən asılı olan, böyrək çatışmazlığından əziyyət çəkən vətəndaşlarımızın keyfiyyətli tibbi xidmətlərdən faydalanmasına şərait yaradılmasıdır.
Yaradılan mərkəzdə pasiyentlərə daha səmərəli, keyfiyyətli və komfortlu tibbi xidmətin göstərilməsi məqsədilə müvafiq satınalmalar həyata keçirilmiş, ən son texnologiyalara uyğun istehsal olunmuş 53 ədəd hemodializ cihazı və müalicə prosesinin daha rahat və effektiv təşkili üçün qurğuya inteqrasiya edilib internet bağlantısı və qulaqcıq girişli, yüksək təsvir keyfiyyətinə malik televizorla təchiz edilib, 3 idarəetmə mühərrikli 48 ədəd hemodializ kreslosu alınıb.
Qeyd edilib ki, Hemodializ Mərkəzinin önümüzdəki ayın sonunda fəaliyyətə başlaması nəzərdə tutulur.
"Naxçıvan şəhərində yaradılan şəraitlə yanaşı, muxtar respublikanın rayonlarında da hemodializ xidmətlərinin təkmilləşdirilməsi istiqamətində tədbirlər görülür. Bu məqsədlə yaxın günlərdə Şərur Regional Tibb Mərkəzinin tabeliyində fəaliyyət göstərən Şərur Rayon Mərkəzi Xəstəxanası və Kəngərli Rayon Mərkəzi Xəstəxanasına, həmçinin Culfa Regional Tibb Mərkəzinin tabeliyində fəaliyyət göstərən Culfa Rayon Mərkəzi Xəstəxanası və Ordubad Rayon Mərkəzi Xəstəxanasına hemodializ cihazları və hemodializ kresloları təhvil verilib.
Görülən bu tədbirlər muxtar respublikanın bölgələrində hemodializ xidmətlərinin keyfiyyətinin yüksəldilməsinə və tibbi xidmətlərin vətəndaşlar üçün daha əlçatan olmasına xidmət edir",- deyə məlumata əlavə edilib.
