“İRƏLİ” Mədəniyyət Mərkəzi və Azərbaycan Musiqi Mədəniyyəti Dövlət Muzeyinin birgə təşkilatçılığı ilə “Solo gənclik” layihəsi davam edir. “İRƏLİ” İctimai Birliyinin həyata keçirdiyi "Solo Gənclik" layihəsi çərçivəsində 2025-ci ilin iyun ayı ərzində gənc istedadların iştirakı ilə üç fərqli konsert keçirilib.
İyun ayının ilk konserti 1 İyun – Uşaqların Beynəlxalq Müdafiəsi Günü münasibətilə keçirilib. Konsertdə “Lalələr” xor kollektivi, Elmira Bağırzadə, Nicat Hüseynov, Mələk Mirzəyeva, Aysel Musayeva, Ömər Dadaşov, Nicat Məmmədli, Aylin Əliyeva, Nəzrin Hüsüzadə, Hüseyn Mustafayev, Valeh Hüseynli, Narıngül Vəliyeva, Yusif Ağayev, Xəyal İbadazdə və Ramal Eyvazlı səhnəyə çıxaraq müxtəlif musiqi nömrələri təqdim etdilər. Konsert həm uşaqların bayram əhval-ruhiyyəsini artırmaq, həm də onların sənətə olan marağını dəstəkləmək məqsədi ilə təşkil olunub.
Ayın ikinci konserti isə gənc pianoçu İsgəndər Muradovun solo çıxışı ilə yadda qalıb. Tədbir gənc musiqiçilərin fərdi bacarıqlarını nümayiş etdirmək və klassik musiqi irsini təbliğ etmək baxımından xüsusi əhəmiyyət daşıyıb.
İyun ayının son konserti isə istedadlı gənc pianoçu İlqar Cavanşirovun çıxışı ilə baş tutub. Gənc musiqiçi qonaqlar üçün klassik janrda musiqi nömrələrini ifa edib. "Solo Gənclik" layihəsinin əsas məqsədi istedadlı gənclərin üzə çıxarılması, fəaliyyətinin stimullaşdırılması və mədəni iştirakçılığının artırılması, musiqi mədəniyyətinin inkişafına töhvə verməkdir.
Hər ay keçirilən konsert tədbrlərindən məlumatlı olmaq və iştirak etmək üçün “İRƏLİ” İctimai Birliyinin rəsmi sosial media hesablarına müraciət edə bilərsiniz. Qeyd edək ki, iştirak ödənişsizdir.
