Son zamanlar təhsil ocaqlarında rüşvət iddiası yayılmaqdadır. Növbəti belə bir xəbər Bakı şəhəri 248 nömrəli tam orta məktəbi ilə bağlı yayıldı.
Məlumata görə, adıçəkilən məktəbin direktoru və müavini rüşvət alıb. Belə ki, direktor və müavini qeyri-qanuni işlərlə - dərs saatlarının pul qarşılığında satılması, məktəbə gəlməyən şagirdlərin 1500-2000 manat dəyərində sözügedən şəxslərə pul verməsi və attestatların 20-30 manat qarşılığında təhsilalanlara verilməsi kimi işlərlə məşğuldurlar.
248 nömrəli məktəb: "Məktəbin nüfuzuna xələl gətirmək üçün yayılan böhtan xarakterli məlumatdır"
Məsələ ilə bağlı 248 nömrəli məktəbdən "Bakı-Xəbər"ə bildirildi ki, iddialar həqiqət deyil: "Məktəbin nüfuzuna xələl gətirmək üçün yayılan böhtan xarakterli məlumatdır. Bu iddiaların məktəbdə çalışan zaman fəaliyyətində ciddi nöqsanlara yol verdiyi üçün əmək müqaviləsinə xitam verilmiş sabiq işçi tərəfindən yayıldığı düşünülür".
Rizvan Fikrətoğlu: "Rüşvətin tələb olunması cinayət və inzibati məsuliyyət yaradır"
Təhsil eksperti Rizvan Fikrətoğlu "Bakı-Xəbər"ə açıqlamasında qeyd etdi ki, rüşvət məsələsi təhsilin bəlasıdır: "Belə məsələlərdən qorunmaq lazımdır. Rüşvətin tələb olunması cinayət və inzibati məsuliyyət yaradır. Bu, direktorların işinin itirilməsinə səbəb ola bilər. Nəzərə almaq lazımdır ki, attestat pulla deyil, dövlət tərəfindən verilir. Dərsə gəlməyən şagirdlərdən pul alınırsa, bu korrupsiyaya əməli sayılır. Bu hallara son vaxtlar daha çox rast gəlirik. Sosial şəbəkədə hansı məsələ ictimailəşibsə onunla bağlı tədbir görülür. İctimailəşməyən, gizlin nə qədər halların olduğunu da düşünmək lazımdır. Bu sahəyə güclü nəzarət olmalıdır, mütəmadi monitorinqlər aparılmalıdır. Məktəb direktorlarından şikayət varsa, müstəqil baxılmalıdır. Rüşvət alan şəxslər təkcə işdən çıxarılmamalıdır, onlar məsuliyyətə cəlb edilməlidir. Korrupsiyadan uzaq, örnək direktorlar stimullaşdırılmalıdır ki, başqaları üçün müsbət imic formalaşsın. Tək şagird üçün yox, hər kəs üçün etik kodeks formalaşmalıdır. Bununla yanaşı, direktor təyinatı tanışlıqdan uzaq olmalıdır. Ümumiyyətlə, direktor təyinatı şəxsin peşəkarlığına, keyfiyyətinə əsasən olunmalıdır. Hesab edirəm ki, direktorların işə qəbulu hazırda qaneedici səviyyədə deyil. Yenidən bəzi məsələlər əlavə olunmalıdır".
Günel CƏLİLOVA
