Şəmsəddin Əliyev: “Gəncədə baş verən hadisə insanları düşündürməlidir”
Məlum olduğu kimi, mayın 12-də Gəncə şəhərində dəhşətli hadisə baş verib. 18 yaşlı Elgün İbrahimov ağır xəsarətlərlə şəhərin tərk edilmiş yataqxana həyətində tapılıb və qısa müddət sonra xəstəxanada həyatını itirib.
Qeyd etdiyimiz kimi, baş vermiş hadisə Gəncə şəhərində qeydə alınıb. Xatırladaq ki, son zamanlar Gəncədə çoxlu sayda xoşagəlməz hadisələr baş verib. Məsələn, küçədə adam döyülür, azyaşlı qızlar qaçırılaraq Gəncəyə aparılır, başqa bir yetkinlik yaşına çatmayan qızın ailəsi televiziyada qızlarını axtardıqlarını deyir, ortaya çıxır ki, qız qoşulub bir oğlana və Gəncəyə qaçıb.
Görəsən, Gəncədə nə baş verir ki, bu şəhərdə cinayətlər bu qədər artmaqdadır?
“Məktəblilərin, tələbələrin fikrini, diqqətini təhsilə, milli-mənəvi dəyərlərə yönəltmək istiqamətində az sayda işlər görülür”
"Polisə Dəstək" İctimai Birliyinin rəhbəri Şəmsəddin Əliyev "Bakı-Xəbər"ə açıqlamasında qeyd etdi ki, son zamanlar təhsil sistemində xoşagəlməz hallar baş verməkdədir: "Bu istiqamətdə görülən işlər yüksək səviyyədə deyil. Məktəblilərin, tələbələrin fikrini, diqqətini təhsilə, milli-mənəvi dəyərlərə yönəltmək istiqamətində az sayda işlər görülür. Cinayətkarlıq həmişə olub və heç bir cəmiyyətin cinayətkarlıqdan doymuş həddi yoxdur. Cəmiyyət, dövlət inkişaf etdikcə cinayət əməlləri də artır. Ancaq kütləvi informasiya vasitələri, vətəndaş cəmiyyəti məlum məsələ ilə bağlı mübarizə aparmalıdır. Həmçinin, Elm və Təhsil Nazirliyi, Ailə, Qadın və Uşaq Komitəsi öz üzərinə düşən vəzifəni icra etməyi bacarmalıdır. Bu sahədə kifayət qədər maarifləndirici tədbirlər həyata keçirilməlidir. Cinayəti törədən səbəblər aradan qaldırılmalıdır, təhsildəki geriliklər də həll olunmalıdır. Bəzi yerlərdə təhsil yox dərəcəsindədir. Belə olan halda uşaqlar təhsilə deyil, kriminala daha çox meyl edir. Kriminal aləmdə tanınan “qəhrəmanlar”a daha çox rəğbətlə baxılır. Bununla yanaşı seriallar da cinayət hadisələrinin artmasına səbəb olur. Hər bir dövlət qurumu cinayətkarlıqla mübarizədə kifayət qədər əmək sərf edir. Ancaq Elm və Təhsil Nazirliyi öz fəaliyyət istiqamətlərinə uyğun iş görməlidir ki, belə halların sayı azalsın. Yeniyetmələri məktəbə qaytarmaq lazımdır. Gəncədə baş verən hadisə insanları düşündürməlidir. Yeniyetməni o hala salanlara milli-mənəvi dəyərlər aşılansaydı, bu gün o gənc həyatda olacaqdı. Bu sıradan bir faciə deyil, qətl hadisəsidir. Tək bir ailənin dərdi, iztirabı deyil, bu, on milyondan çox insanın dərdidir. Bəşəri dəyərləri qorumaq üçün sosial səbəbləri aradan qaldırılmalıdır. Bunun üçün müvafiq qurumlar səfərbər olmalıdır”.
Günel CƏLİLOVA
