Mədəniyyət Nazirliyi Respublika Xatirə Kitabı Redaksiyası mayın 15-də YAP Şəmkir rayon Təşkilatının binasında Vətən müharibəsi şəhidi, XTQ giziri Babək Səhman oğlu Namazovun həyat və döyüş yolundan bəhs edən “Cəsur Vətən oğlu” kitabının təqdimatını keçirib. baki-xeber.com-un məlumatına görə, kitabda Babək Namazovun Vətən sevgisi, torpaq andı, vətəndaşlıq missiyası və ən əsası, qorxmaz, cəsur əsgər əzmi geniş anlamda xarakterizə edilib. Tanmış şair, publisist Hikmət Məlikzadənin qələmə aldığı kitab Respublika Xatirə Kitabı Redaksiyası ilə “Bakı Xəbər” qəzetinin birgə layihəsi olan “Şəhidlər ölməz, Vətən bölünməz!” silsiləsindən nəşr olunub.
Qeyd edək ki, birgə layihə əsasında Qarabağ müharibəsində həlak olanların adlarının və xatirələrinin əbədiləşdirilməsi məqsədilə bir neçə kitab nəşr edib, həmin kitabların təqdimatını keçirib. Təqdimat mərasimində şəhidin ailə üzvləri, rayon ictimaiyyətinin nümayəndələri, YAP fəalları, rayon icra hakimiyyətinin təmsilçiləri iştirak edib. Tədbiri açan şair-publisist Rəfail Tağızadə şəhidin keçdiyi döyüş yolu barədə məlumat verdi. Tədbirdə çıxış edən YAP Şəmkir rayon Təşkilatının sədri Fəxrəddin Vəliyev dedi ki, şəhidlərimiz bizim ən uca zirvəmizdir. Şəmkir şəhidləri barədə də məlumat verən F. Vəliyev qeyd etdi ki, 331 şəmkirli canını vətən yolunda qurban verib şəhidlik zirvəsinə ucalıblar. Babək Namazovun qəhrəmanlığı haqda da danışan F. Vəliyev bildirdi ki, qəhrəman şəhid 6 medalla və Azərbaycan Bayrağı ordeni ilə təltif edilib. Respublika Xatirə Kitabı Redaksiyasının baş redaktoru Nazaket Mammadova çıxışında bildirdi ki, təqdimat mərasimi keçirilən kitab da Xatirə Kitabı ilə "Bakı-Xəbər" qəzetinin birgə layihəsi çərçivəsində çap olunub:"Elə hazırda təqdimatına yığışdığımız “Cəsur Vətən oğlu” kitabı da məhz bu layihə əsasında hazırlanıb. Kitab Vətən müharibəsi şəhidi, XTQ giziri Babək Səhman oğlu Namazovun həyat və döyüş yolundan bəhs edir, burada Babək Namazovun Vətən sevgisi, torpaq andı, vətəndaşlıq missiyası və ən əsası, qorxmaz, cəsur əsgər əzmi geniş anlamda xarakterizə edilib. Ümid edirik ki, bu kitab gənc nəslin vətənpərvərlik ruhunda böyüməsi üçün böyük əhəmiyyət kəsb edəcək". Kitabın müəllifi Hikmət Məlikzadə də çıxış etdi. H. Məlikzadə bildirdi ki, şəhidlərinin adını əbədiləşdirmək hər birimizin mənəvi borcudur. Kitabın ərsəyə gəlməsində Nəzakət Məmmədovaya və şəhidin əmisi Mehman Namazova təşəkkür etdi. "Şəhidin valideynlərinə demək istəyirəm ki, bu kitabı bir orden və medal kimi qəbul edin". Şəhidin atası Sahman Namazov bildirdi ki, əvvəllər oğul ataya görə tanınırdı, amma indi atalar şəhid oğullara görə tanınır. Şəhid Babəkin anası Mehriban Namazova isə kitabın ərsəyə gəlməsində əməyi olanlara təşəkkür etdi. Kitabın ərsəyə gəlməsinə təşəbbüs göstərən şəhidin əmisi Mehman Namazov dedi ki, Babək haqqında keşmiş zamanda danışmaq çox çətindir: "Deyirdim ki, necə edim ki, Babəkin adı tarixdə qalsın. O dəfn edildiyi gündən içimdə bu ağırlıq vardı ki, necə edim bir iş görüm. Sonra Xatirə Kitabı Redaksiyasına getdim və Nəzakət xanımla görüşdük, kitab yazılmağa başladı". Bu kitabın təkcə Babək Namazova deyil, Azərbaycan şəhidlərinə verilən qiymətin təzahürüdür. İradə Abuzərli bildirdi ki, Babəkin qəhrəmanlığı ilə fəxr edir və onun həyat və döyüş yolu haqda məqalə hazırlayıb. Baş leytenant Nurəhməd idrisov Babək həqiqətən də döyüş yolu keçib, irəlidə gedən hərbi qulluqçu olub. Şəhidin qohumu və Əqli Mülkiyyət Agentliyinin əməkdaşı Amaliya Qəmbərova bildirdi ki, bu kitabda Babəkin qısa və mənalı ömrü əks olunub. A. Qəmbərova fədakar fəaliyyətə görə başda Nəzakət Məmmədova olmaqla Xatirə Kitabı Redaksiyası kollektivinə təşəkkür etdi. B.Namazovun bibisi Zərnigar xanım çıxışında bildirdi ki, oğullar Vətən torpağını azad etmək uğurunda canlarını qurban verib və qardaşı oğlu ilə daim qürur duyur. Şəmkir rayon Əliyaqublu kənd məktəbinin direktoru Ziyafət Aslanovaya söz verildi, o bildirdi ki, bu kitab xalqımızın qüruru olan Babək Namazovu xalqa tanıdır. Məktəbli Rəşad Hüseynov şəhidə həsr olunan şeir söykədi. Şəhid haqqında danışan Orxan Məmmədov bildirdi ki, Babək qısa və mənalı həyat və döyüş yolu keçib. Vüqar, Sonda şəhidin Əliyaqublu kəndindəki məzarı ziyarət edildi. Tədbirdən hazırlanan geniş yazı ilə növbəti sayımızda tanış ola bilərsiniz. İradə SARIYEVA Şəmkir
