Plastik cərrahiyyənin vahid standartları olacaq - standartı aşanlar cəzalanacaq...
Rasif Bağırov: “Yerli həkimlərlə yanaşı, xarici həkimlərin də bilik, təcrübə səviyyəsi həmin standartlara uyğun olmalıdır”
Son günlər plastik cərrahiyyə, onun yaratdığı fəsadlar cəmiyyətin müzakirə mövzusudur. Əsasən qadınların üz tutduğu bu cür əməliyyatlar həmişə uğurlu alınmır. Bunun səbəblərindən biri isə cərrahların, həkimlərin qeyri-peşəkarlığıdır. Elə bu səbəbdən də son dövrlər ölkədəki plastik cərrahlarla bağlı şikayətlər artıb, hətta barəsində cinayət işi qaldırılan cərrahlar da var.
Bu sahədə yaşanan problemləri həll etmək üçün vahid standartlar olacaq. Bu məqsədlə klinik protokollar hazırlanır. Səhiyyə Nazirliyinin yaydığı məlumatda qeyd edilir ki, sözügedən protokolların qısa müddətdə yekunlaşdırılması və təsdiq edilməsi planlaşdırılır.
Maraqlıdır, plastik cərrahiyə ilə bağlı vahid standartlar bu sahədə qeydə alınan problemləri həll edəcəkmi?
“Tətbiq olunacaq yeni standartlarda estetik əməliyyatların qiyməti də əks olunacaq, kim nə istəyir, o məbləği təyin edə bilməyəcək”
Həkim ekspert Rasif Bağırov “Bakı-Xəbər”ə şərhində bildirdi ki, plastik cərrahiyə ilə bağlı vahid standartın hazırlanması, qaydaların tətbiqi dövlət tərəfindən bu sahəyə diqqət göstərildiyini nümayiş etdirir: “Bu yaxşı haldır. Məlumdur ki, plastik cərrahi əməliyyatların qiyməti olduqca yüksəkdir. Tətbiq olunacaq yeni standartlarda estetik əməliyyatlatların qiyməti də əks olunacaq, kim nə istəyir, o məbləği təyin edə bilməyəcək. Həmçinin, xəstə-həkim münasibətlərində də tənzimlənmə olacaq. Bununla yanaşı, əməliyyatdan sonra baş vermis fəsadların protokola uyğun gəlib-gəlməməsi kimi hallar da xəstənin xeyrinə olacaq. Belə bir standartın müəyyənləşməsi xəstə üçün müsbət nəticələrə səbəb ola bilər. Həmçinin, tətbiq ediləcək yeni vahid standartda həkimin hansı estetik əməliyyatı edib-etməməsi də qeyd ediləcək. Bəzi həkimlər var ki, plastik cərrahiyyə sahəsinə meyl edir. Bunun da səbəbi qeyd edilən sahənin sığortaya daxil olunmamasıdır. Eyni zamanda, aidiyyəti olmayan həkimlərin qeyd edilən sahədən uzaqlaşmasına səbəb olacaq”.
Həmsöhbətimiz hesab edir ki, xaricdən gələn həkimlər də vahid standarta uyğun hərəkət etməlidir: “Etiraf edək ki, xaricdən gətirilən həkimlərin bir qismi öz ölkəsində uğurlu həkim kimi tanınmadığı üçün Azərbaycana üz tutur. Yerli həkimlərlə yanaşı, xarici həkimlərin də bilik, təcrübə səviyyəsi həmin standartlara uyğun olmalıdır”.
Günel CƏLİLOVA
